«Қазақмыс» өндірісшілердің жалақысын көтереді

Дүйсенбі күні Қазақ­мыс Тобы биылғы жыл­дың 1 сәуірінен бас­тап өн­ді­ріс­те жұмыс істей­тін қыз­­меткерлердің еңбек­ақы­­ларын 10 пайызға өсі­ре­тін­дігін хабарлады. 2014 жыл­ғы 14 ақпанда Үкіметтің кеңей­тілген отырысындағы Пре­зидент Нұрсұлтан Назар­­баев­тың ұсынысына орай осындай шешім қабылданған. «Бұл жөнінде нақ­ты шешім дәл кеше қабылдана қой­мағанымен, Елбасының еңбек адамының жағдайын жасауға қа­тысты ойы мыс өндірушілердің жұ­­мысын ұйымдастырушылар та­­ра­пынан түсіністік тауып отыр. Компания басшылығы осы мәселе бойынша таяу күндерде арнаулы мәлімдеме жасамақшы». – Әріптесіміз Айқын Несіпбайдың сенбі күні жарияланған «Жалақыны өсіру мәселесі шешіледі» атты мақаласы осылай аяқталған еді. Солай болып та шықты. «Қазақмыс» соңғы жылдары өз қызметкерлерінің еңбекақыларын өсірген осы саладағы санаулы компаниялардың бірі екен­дігімен мақтана алады. Мәсе­лен, 2012 жылдың өзінде жұмыс­шы­лардың еңбекақысы орта есеп­пен 30 пайызға өсірілген. Осы­лайша қазірге «Қазақмыстағы» өнді­ріс­ші­лердің еңбекақы деңгейі осы сала бойынша ең жоғары болып отыр. «Теңге бағамының өзгеруі біздің қызметкерлеріміздің де алаңдаушылығын тудырды және біз қабылдаған шешім олардың отбасыларына демеу болады деп сенеміз. Қазақстандағы кәсіп­орын­дарымызда шамамен 55 000 адам жұмыс істейді. Олардың басым бөлігі тікелей өндірісте еңбек етеді және компания қашан­да өндірісте жұмыс істейтін қыз­меткерлер үшін әділ жалақы төлеу саясатын ұстанады», деп мәлімдеді Қазақмыс Тобының басқарушы бас директоры Олег Новачук. Ал «Қазақмыс» корпорациясы – мыс, алтын, мырыш, күміс, электр энергиясын өндіруде елеулі активтері бар, табиғи ресурстарды өндіру және өңдеумен айналысатын халықаралық жетекші топ болып табылады. «Қазақмыстың» 16 кеніші, 8 тау-кен фабрикалары және екі мыс балқытушы өндірістік кешені бар, қазір олардың бірінде қайта құру жұмыстары жүргізілуде. Мыс өндірісі кен өндіруден бастап мыс катанкасын және катодты мыс түріндегі дайын өнім шығаруға дейін толықтай интеграцияланған. 2013 жылы меншікті кеннен 294 мың тонна катодты теңгерімдегі мыс өндірілді. Бұл өндіріс электр энергиясының ішкі тасымалдарымен және ауқымды теміржол инфрақұрылымымен қамтамасыз етілген. Айнаш ЕСАЛИ, «Егемен Қазақстан». Жезқазған.