Қостанайда бұрынғы судьялар сотталды

Қостанай облысында қалалық соттың бұрынғы төрағасы Самалбек Мұхтаров пен экс-судья Серік Қашқынбаевтың әрекеттеріне қатысты үкім шығарылды. Бұл туралы «Хабар» телеарнасы хабарлады. Сот процесі кезінде прокуратура қызметкері олардың кінәсі толық дәлелденгенін айтты.Оған айғақ ретінде бейнежазбалар бар. Жалпы, қылмыстық істе екеуінің сот ісін жеке адамның пайдасына шешіп бермекші болып, тараптардың бірінен пара алғаны жазылған. Бұл мәселеге қатысты бұған дейін де бұқаралық ақпарат құралында бірнеше дәйектеме айтылды. Сол өткен жылдан бастау алған келеңсіздік әрекетке биыл нүкте қойылып отыр. №2 Қостанай қалалық сотының судьясы Ержан Шыңғысовтың шығарған үкімі бойынша айыпкердің біріне мынадай жаза тағайындалды:  «Сот Самалбек Мұхтаровты Қылмыстық кодекстің 24 бабының 3-ші тармағы, 311 баптың 3-ші тармағы және 311 баптың 4-ші тармағы бойынша кінәлі деп таныды. Сондай-ақ, Қылмыстық кодекстің 58 бабының 3-ші тармағы негізінде С.Мұхтаровқа дүние-мүлкін тәркілеу және 7 жылға бас бостандығынан айыру жазасы тағайындалсын». Келесі айыпкер С. Қашқынбаев сот үкімімен жалпы режимдегі колонияда 5 жыл жазасын өтейтін болды. Әмірхан Алмағанбетов. Дереккөз: «Хабар» телеарнасы. Фото: «Хабар» телеарнасы.