Отандық өндірушілерге мүмкіндік

Ор­та­лық коммуникациялар қыз­метінде дәстүрлі брифинг өтті. Басқосудың бұл жолғы қона­ғы Қазақстанның Ұлттық кәсіп­керлер палатасының басқарма төрағасы Абылай Мырзахметов болды. Брифингте ол теңгенің айырбас бағамына енгізілген түзетулерге қатысты палатаның ұстанымын мәлімдеді. «Айырбас бағамының жа­ңа деңгейі экспортқа бағыт­тал­ған салалардың бәсекеге қа­бі­леттілігін арттырып, қайта өңдеу өнер­кәсі­бінің кейбір салаларында, оның ішінде, азық-түлік өнімдерінде импортты алмастыруда отандық өндірушілерге сөзсіз жаңа қарқын береді. Алай­да, шағын және орта бизнес кәсіпорындарында валюталық несиелер бойынша қызмет көр­сету және өзіндік құнын­да жоғары импорттық құ­рамды құ­райтын мемлекеттік сатып алулар шарттары бойынша мін­деттемелерді орындауда қиын­дықтар туындап отырғанын ұмыт­паған абзал», деді Ұлттық па­ла­таның басқарма төрағасы А.Мырзахметов. Сонымен қа­тар палата шағын және орта биз­несті қолдау туралы және ұзақ мерзімді экономикалық өсімнің алғышарттарын жасау бойынша тиімді шаралар әзірлеуге аса көңіл бөлу керек деп санайды. Елбасы Нұрсұлтан Назарбаев 14 ақпанда өткен Үкіметтің кеңейтілген отырысында айырбас бағамына енгізілген түзетулер экономиканың өсуін кем дегенде 6 пайызға қамтамасыз ететінін, яғни бюджеттік түсімдердің өсімі байқалатынын атап өткен-ді. Мем­лекет басшысының тап­сыр­масы бойынша шағын және орта бизнес субъектілерін қаржы­ландыру қолжетімділігінің кеңей­тілуі есебінен кәсіпкерлікті дамытуды ынталандыру жұмыс­тары қолға алынбақ. Осылайша Ұлттық қордан ұзақ мерзімді несие ресурстары­мен қамтамасыз ету аясында кәсіпкерлікті дамытуға 2014-2015 жылдары 1 триллион теңге бөлінбек. Аталған несие қара­жаттары индустриялан­дыру бағ­дар­ламасының басымдықтары бойынша тек қайта өңдеу кәсіп­орындарын дамытуға бөлінетінін атап өткен жөн. Әбдірахман ҚЫДЫРБЕК, «Егемен Қазақстан».