Негізі ағаштан соғылып, темір және сүйек әшекейімен өрнектелген кебеже Жанбосын Текқұлұлы есімді шебердің қолынан шыққан. Жәдігерді музейге колөнершінің немересі Шахмардан Жанбосынов тапсырыпты. Айта кету керек, аталған шебер жасаған арба, ат әбзелдері сияқты бұйымдар да музей төрінен орын алған.
Жалпы, кебеже көшпелі және жартылай көшпелі өмір салтын ұстанған қазақ халқы үшін аса қажет тұрмыстық бұйымның бірі болды. Мұнда сол заманның адамдары күнделікті тұрмыста жиі және ұзақ уақыт қолданған заттарын сақтаған.
Уақыттың сынына төтеп берген кебежені суретші-реставратор, Мәдениет қайраткері Ерғазы Исатаев қалпына келтірген.
Бұдан бөлек, Мәкен Төрегелдин музейінің ашық аспан астындағы экспозициясы ұста жабдығымен де толықты. Мұнда келушілер құрал-саймандар жасауға арналған түпнұсқалық көрігімен, ұстаның темір соғатын төсі және шеберлердің басқа да құралдарымен таныса алады. Мамандардың айтуынша, мұндай ұстаханалар XIX ғасырдың аяғы мен XX ғасырдың басында қазақ ауылдарында жиі кездескен.
Қарағанды облысы,
Жезді кенті
