«Сыбайлас жемқорлыққа қарсы қызмет ауқымды арнайы операцияның нәтижесінде Ауыл шаруашылығы министрлігінің ведомстволық бағынысты бөлімшелері мен ұйымдары, сондай-ақ Нұр-Сұлтан, Шымкент, Ақмола, Түркістан, Жамбыл, Шығыс Қазақстан, Батыс Қазақстан, Атырау және Ақтөбе облыстары әкімдіктерінің қатарынан қылмыстық топтардың қызметінің жолын кесті», деді Алекешев.
Оның айтуынша, олар субсидиялау үшін бөлінген бюджет қаражатын ұрлаумен айналысқан, сондай-ақ кәсіпкерлерден жүйелі пара мен заңсыз сыйақы алудың сыбайлас жемқорлық схемасын ұйымдастырған.
«Қазіргі уақытта тергеу шаралары жүргізілуде, заттай дәлелдемелер алынды, 30-дан астам адам анықталды, олардың көпшілігі қазірдің өзінде қылмыстарын мойындады. Тергеу мүддесі үшін басқа ақпарат жария етілмейді», деді көмекші.
Бұған дейін ҚР Сыбайлас жемқорлыққа қарсы іс-қимыл агенттігі Нұр-Сұлтан, Шымкент қалаларында, сондай-ақ Түркістан, Шығыс Қазақстан, Батыс Қазақстан, Ақмола және Ақтөбе облыстарында жедел-тергеу іс-шаралары жүргізіліп жатқанын хабарлаған болатын.
Барлық қылмыстар ауыл шаруашылығы үшін субсидия ұрлаумен байланысты екені атап өтілді.
