Аймақтар • 09 Қараша, 2021

Мобильді кино фестивалі

Қостанай облысында мобильді кино фестивалі өтіп жатыр. Фестивальге жасы 16-дан асқан, бойында қабілеті, қалтасында смартфоны бар кез келген тұрғын қатыса алады. Ең бастысы, шағын фильмде әуесқой автордың шығармашылық ізденісі айқын көрінуге тиіс.

Нұрқанат ҚҰЛАБАЕВ

Нақтылай айтқанда, байқауға қатысушы бір фильмде сан қырынан көрініп, сценарист, режиссер, оператор, монтаж, тіпті актер ретінде де өз шеберлігімен ерекшеленуі керек.

Фестивальді ұйымдастырушы белгілі режиссер Фархат Серкебаев қатысушылардың қатары күннен-күнге көбейіп келе жатқанын айтады. Үміткерлер «Үздік режиссура», «Үздік операторлық жұмыс», «Үздік сценарий», «Үздік актер», «Үздік әлеуметтік ролик», «Үздік мотивациялық ролик», «Үздік комедия», «Көрермендер көзайымы» сияқты 7 аталым бойынша бақ сынайды.

– Жобаның басты ерекшелігі сол – кез келген адам өз фильмін мобильді құрылғысына түсіре алады. Ол үшін үлкен түсірілім тобы да, аппаратура да, арнайы алаң да қажет емес. 5 минуттан аспайтын фильммен байқау жеңімпазы атануға әркімнің мүмкіндігі бар. Жанрлық шектеу де жоқ. Ол әлеуметтік драма бола ма, әлде комедия ма, ең бастысы, идеяға мән беріледі. Ауқымды жобамызды «Қазақфильм» киностудиясы қолдап отыр, деді Ф.Серкебаев.

Ұйымдастырушының айтуынша, шараның бастапқы мақсаты Тобыл өңірінің тұрғындары арасынан үздіктерді іріктеу болатын. Бірақ соған қарамастан, фестиваль сайтына Алматы, Шымкент, Тараз, Орал қалаларының тұрғындары да материалдарын жүктеген. Сондықтан, екпінді Қостанай облысына салып, әлі де көп қатысушының өтінім беруін күту жоспарда бар.

Фестиваль ережесіне сәйкес, 10-20 қараша аралығында іріктеу айналымы өтіп, 26 қарашада жеңімпаздар марапатталуы тиіс. Жеңімпаздарға монтаж жасауға арналған компьютер, қымбат смартфон, дрон секілді бағалы сыйлықтар табыс етіледі.

Қостанай облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз