Ақпанда ашылған гүл

ҚазҰУ-дің №18 жатақханасында бәйшешек қауыз жарды. Бұл көп жылдық тамыр түйнекті өсімдік. Оның ғылымда Еуразияда, Жерорта теңізінің жағалауларында өсетін 80-ге жуық түрі белгілі. Гүл тұқымын жатақхана мең­геру­шісі М.Ниетбаева және жа­тақ­хана қызметкерлері студенттермен бірге қыркүйек айында бөлмеге отырғызған еді. Міне, сол бәйшешектер ақпанның соң­ғы аптасында қауызын жарып, әде­мі гүлдерімен таңғалдырды. Шоқталып, айналасына шуақ шашып жайнап өскен әсем гүлдің әдемілігінде сөз жоқ. Таңд­анып, тамсанып жатқандар оны ҚазҰУ-дің 80 жылдығына қалашықта ал­ғаш гүл ашқан табиғаттың таң­ғажайып тартуы деп баға берді. Жақсылыққа балап жатқан жан­дардың бірі – жатақхана қыз­мет­кері К.Қасымбекова. Ол: «Гүл өсіру адамға әдемі әсер сыйлайды. Жабық­қан, көңілің құла­зыған шақтың өзінде бөлмеңде гүлің болса, сенің бойындағы бар нашар энергияны өзіне жұтып алады. Бәйше­шектің гүлдегеніне бір-екі күн болды. Жоспарлаған уақытымыздан ерте қауыз ашады. Жатақхана меңгерушісінен бас­тап, студент­тері­мізге дейін ерекше қуанышта», – деп өз әсерімен бөлісті. «Айна­лаңды нұрлан­дыр!» жобасы аясында игі шаралар жасап жатқан студенттер үйінің басшылығы мен қызметкерлеріне игі шараларыңыз жалғасын тауып, жақсы жұмыстар нәтижесін бергей деп ақ ниетімізді жеткіздік. Досжан БАЛАБЕКҰЛЫ, Әл-Фараби атындағы ҚазҰУ-дің 3-курс студенті.