Өткен аптада облысқа Pfizer вакцинасының алғашқы 35 100 дозасы жеткізілген болатын. Аталған вакцина жүкті және бала емізіп жүрген әйелдерге, 12-18 жас аралығындағы жасөпірімдерге арналған. Бүгінде аймақта аталған категорияда 120 мыңға жуық азамат бар, оның 85 мыңдайы – жасөспірімдер.
Өскемендегі №1 емханада мектеп, колледж оқушылары өз еріктерімен, ата-аналарының келісімімен екпе алуға кезекке тұрған. Ұзын сонар кезек... Егуге машықтанған медбикелер жасөспірімдерді кезегімен кіргізіп, індетке қарсы егіп жатты. Еккен соң су тигізбеу керектігін және ескертіп отырды.
– 15 қарашадан Шығыс Қазақстан аумағында 16-18 жас аралығындағы балаларға егу жұмыстары басталды. Сонымен қатар Pfizer вакцинасы 16-37 апта аралығындағы жүкті әйелдерге егіле бастады. Бала емізіп жүрген әйелдер босанғандарына 42 күн болған соң ғана екпе ала алады. 15 қараша күні №1 емханада 12 жасөспірім екпе алды. Бәрінің жағдайы жақсы, – дейді Өскемен қалалық №1 емханасының бас дәрігері Айман Болатқызы.
Дәрігерлердің айтуынша, АҚШ пен Израильде тәжірибеден өткізілген Pfizer вакцинасы өте тиімді, әрі қауіпсіз. Кейбір мемлекеттерде екпені 5 жастағы балаларға да алып жатқан көрінеді. Ал Қазақстанда 12 жастан бастап егіледі. Дей тұрғанмен, денсаулық сақтау саласының мамандары алғашында 16 жастан асқан балаларды вакциналауды жөн көрген. Атап өтейік, балалар және жасөспірімдерге екпе салу міндетті түрде ата-анасының немесе заңды өкілдің рұқсатымен ғана жүргізілетін процедура.
Екпе алып шыққан жасөспірімдер дәрігердің қарауында жарты сағаттай болады. Содан кейін ғана үйлеріне қайтарылады. Ол үшін емханаларда арнайы бөлме жабдықталған. Тіпті ыстық шайға дейін ұсынылады.
– Вакцина алуға ата-анамның рұқсатын алып, өз еркіммен келіп отырмын. Әлемді жайлаған індеттің қандай қауіпті екенін білеміз. Білген соң да короновирус инфекциясына қарсы екпе алуға келдік, – дейді Өскемен жоғарғы медициналық колледжінің 1 курс оқушысы Дильназ Айдынқызы.
Бүгінгі таңда облыс бойынша 12 жастан 18 жасқа дейінгі 1100-ден астам баланың ата-анасы екпе алуға келісім берген. Бірінші кезеңде 16 – 18 жас аралығындағы жасөспірімдер, содан кейін 12 – 15 жас аралығындағы оқушылар вакциналанады. Сондай-ақ 82 жүкті, 217 бала емізетін әйел вакцина алуға кезекке тұрған.
Облыстық денсаулық сақтау басқармасы басшыларының айтуынша, вакцинаның қауіпсіздігі мен тиімділігін қамтамасыз ету үшін белгілі температурадағы термоконтейнерлерде ғана тасымалданады.
Ескерте кетерлігі, Шығыс Қазақстан «жасыл» аймақта болғанымен, короновирус індетіне шалдығып жатқандар аз емес. Соңғы тәулікте 42 адамнан анықталған. Оның 39-ы симптомды болса, үшеуі симптомсыз. Стационарларда жалпы 566 науқас ем алып жатыр. Облыс бойынша төсек қорының жүктемесі 15%-ды құрап отыр. Өткен тәулікте 16 пациент толықтай сауығып шыққан. Қалай дегенмен, карантиндік шараларды сақтануымыз шарт.
Шығыс Қазақстан облысы
