Таразда секундына 38 метрге дейін соққан қатты жел қала инфрақұрылымына айтарлықтай зиян келтірді.
19 көпқабатты үйдің, 17 мектептің, 4 балабақшаның шатыры бүлінген. Электр желілерінің зақымдалуына байланысты жылу жеткізетін бес шағын қазандық тоқтатылды. 45 ағаш, 12 аялдама және 32 бағдаршам құлады. 34 билборд, 9 жарнамалық пилон және 64 жалау зақымдалған.
Тараз қаласы әкімдігінің медиа орталығы мәлім еткендей, бүгінгі күннің нәтижесі бойынша тоқтатылған бес қазандықтың төртеуі қосылып, 52 көпқабатты тұрғын үйдің тұрғындарына жылу таратылды. Электр энергиясының жоқтығынан «Бином» ТК №7 үйін жылытатын бір қазандық әлі қосылмаған. Газбен жабдықтауға 187 абонент қосылды, 39-ын (жеке тұрғын үйлер) аяқтау қалды. 32 бағдаршамның 18-і қайта орнатылды. Жел соққан барлық 12 аялдама қалпына келтірілді. 45 ірі құлаған ағаштардың 35-і алынып тасталды. Мектеп оқушыларын оқытуға келетін болсақ, бүгінгі күні Тараз қаласының аумағында 19 мектеп офлайн режимінде, 41 мектеп онлайн режимінде оқиды. 45 балабақшаның 41-і бұрынғы режимде жұмыс істейді, төрт балабақшада желмен зақымдалған шатырларды қалпына келтіру қажет.
«Келтірілген залал бойынша есеп айырысу жүргізілуде. Барлық коммуналдық кәсіпорындар мен мекемелер күшейтілген режимде жұмыс істеуде. Қалпына келтіру жұмыстары жалғасуда», деді Тараз қаласының әкімдігі.
Еске сала кетсек, 16 қарашада Жамбыл облысының аумағында желдің секундына 30 метрге дейін күшеюі туралы хабарланды. Жамбыл облысының полиция департаменті көлік жүргізу қауіпті болғандықтан, жүргізушілерді мүмкіндігінше үйде болуға шақырды.
