Пікір • 19 Қараша, 2021

Азаматтарға берілген мүмкіндік

165 рет
көрсетілді
3 мин
оқу үшін

Ұлттық қоғамдық сенім кеңесінің кезекті алтыншы отырысында Мем­ле­кет басшысы Қасым-Жомарт То­қа­ев бірнеше маңызды бастаманы жария етті. Кеңес жұмысына бір­не­ше аймақтан онлайн қосылған әріп­тестеріміз көкейде жүрген көп­те­ген маңызды мәселені көтеріп, ой-пікірін ортаға салды.

Азаматтарға берілген мүмкіндік

Біздің әріп­тестеріміз, Саяси реформалар то­бын­д­ағы кеңестің мүшелері Алек­сандр Данилов, Марат Шибұтов және Гүлмира Илеуова ауыл әкімдерінің сайлау процестеріне қатысып, еліміздің бірнеше өңіріне арнайы іссапармен барып қайтқан еді. Ауыл әкімдерінің сайлау тәр­ті­бін бақылауды мақсат тұтқан осы са­пар­лардың қорытындысы бо­йын­­­­ша олар бірнеше сараптама жаз­­­ған болатын. Өткен жолы әріп­тес­те­ріміз осы өзекті мәселеге қа­тыс­ты то­лық ақпаратты біздің наза­ры­мызға ұсы­нып, басқосуда өзара талқыға салып, пікір алмасқанбыз. Әсі­ресе, ке­ңес мүшелерінің ауыл əкімі үміт­кер­лігіне арнаулы орта білімі бар азаматтарға рұқсат беретін норманы бекіту жөніндегі ұсынысы кеңінен сөз болған еді.

Осы ретте Саяси реформалар то­бын­дағы кеңес мүшелері ортаға салған ұсыныстары өте орынды әрі маңызды деп санаймын. Себебі ауыл әкімдерін сайлау механизмі – қазіргі таңда өте маңызды түйткілдердің бірі. Уа­қыт өте бұл бағыттағы жұмыстар, қол­ға алынған іс-шаралар өзінің оң нәтижесін беріп келеді. Мұны кеше ел Президенті «Партиялардың белсенділік танытуы, өзін өзі ұсын­ған азаматтардың көптігі және сайлау­шы­лардың дауыс беруге көптеп келуі бұл реформаның орынды екенін әрі уақтылы қолға алынғанын көрсетті. Мұның бәрі Ұлттық қоғамдық сенім кеңесі ұсынған бастамалардың бір бөлігі ғана. Оны жүзеге асыру қазақ­стан­дықтардың тұрмысына тікелей әсер етіп, мемлекеттік басқару ісінің сапа­сын жақсартады» деп атап өтіп, кеңес мүшелерінің ұсынысын бір­ауыз­дан қолдады. Әрине, сайлау про­цестерінің әлі де жетілдіретін тұс­та­ры бар. Мемлекет басшысы да бұл ұсыныстардың алдағы уақытта сайлау тәртібін оңтайландыра түсу үшін өте қажет екенін атап өтті.

Мемлекет басшысының Кеңес отырысында ауыл әкімдерін сайлауға қатысты айтқан жаңашылдығы, яғни ауыл әкімдері сайлауына орта білімі бар азаматтарға түсуге жағдай жасау туралы ұсынысы көңіл қуантады. Өйткені орта білімі бар азаматтардың да сайлауға қатысуы бұл әкімдікке үміткерлер санын бірнеше есеге арттырады. Еліміздің көптеген ауыл-аймағында кадр тапшылығы айқын сезіледі және мұны баршамыз жақсы білеміз. Ал мұндай жаңа бастама ауыл әкімдері сайлауының бағасын арттырып қана қоймай, туған ауылын көркейтемін деген азаматтар үшін зор мүмкіндік екені сөзсіз.

 

Асхат САДЫРБАЙ,

Ұлттық қоғамдық

сенім кеңесінің мүшесі