Осыдан екі апта бұрын Белград төрінде мәреге жеткен бокстан әлем чемпионатында Қазақ елінің былғары қолғап шеберлері 2 алтын, 2 күміс және 1 қола медаль олжалап, жалпыкомандалық есепте Куба жігіттерін алға жіберіп, екінші орынға тұрақтаған еді. Жаһандық додада Теміртас Жүсіпов (48 кг) пен Сәкен Бибосынов (51 кг) әлем чемпионы атанса, Махмұд Сабырхан (54 кг) мен Серік Теміржанов (57 кг) күміс жүлдеге, ұлттық құрама капитаны Абылайхан Жүсіпов (67 кг) қола жүлдеге ие болды.
Боксшылардың қаржылай сыйақыларын Қазақстан бокс федерациясының басшысы Кеңес Рақышевтың өзі табыстады. Әлем чемпионы атанған боксшының әрқайсысына 70 мың доллар, күміс жүлдегерлерге 50 мың доллар, қола жүлдегерге 25 мың доллар көлемінде сыйақы берілді.
– Бокс – қазақтың ұлттық спортының біріне айналып кетті десек, артық айтқандық болмайтын шығар. Өйткені бұл спорт түрінен бізде дәстүрлі ұрпақтар сабақтастығы бар. Белградтағы әлем чемпионатына келсек, жаңартылған құрам сәтті өнер көрсетті. Біз алға қойған міндетімізді орындап, жанкүйерлердің үмітін ақтадық деп есептеймін. Спортшыларымызды Белградтағы жетістіктерімен құттықтаймын! – деді ҚБФ президенті Кеңес Рақышев.
Сондай-ақ бокстан ұлттық құраманың жаттықтырушылар құрамы, олардың жеке жаттықтырушылары, кешенді ғылыми топ мамандары және әлем чемпионатында өнер көрсетіп, бірақ жүлдеге ілінбей қалған боксшылар да федерация басшылығының назарынан тыс қалған жоқ.
Атап айтар болсақ, бокстан ерлер құрамасының бас бапкері Қайрат Сәтжановқа, әлем чемпиондарының жеке бапкерлері Қуанышбай Көкішев (Т.Жүсіповтің бапкері) пен Мырзағали Айтжановқа (С.Бибосыновтың бапкері) 10 мың доллар, күміс жүлдегерлердің жеке жаттықтырушылары Ілияс Оралбеков (М.Сабырханның бапкері) пен Азамат Мақажановқа (С.Теміржановтың бапкері) – 8,5 мың доллар, қола жүлдегердің жеке жаттықтырушысы Бауыржан Аманбаевқа (А.Жүсіповтің бапкері) 5 мың доллардан берілді.
Әлем чемпионатына қатысқан Саматәлі Төлтаев (60 кг), Санатәлі Төлтаев (63,5 кг), Асланбек Шымбергенов (71 кг), Нұрқанат Райыс (75 кг), Нұрбек Оралбай (80 кг), Бек Нұрмағанбет (86 кг), Айбек Оралбай (92 кг) және Нұрлан Сапарбайларға (+92 кг) 800 мың теңге және олардың да жеке жаттықтырушыларына 400 мың теңгеден сыйақы берілді.
Сонымен қатар ұлттық құраманың аға жаттықтырушысы Нүркен Андасов – 7 мың доллар, команда жетекшісі Асқар Шәріпов, дәрігер Талғат Куканов және массаж жасаушы Әлібек Әбілов 2 мың доллар көлеміндегі ақшалай сыйақыға ие болды.
Тағы бір айта кетерлігі, әлем чемпионатының алтын медаліне ие болған спортшыны мемлекет 15 мың доллармен, күміс жүлдегерді 7 мың доллармен, ал қола жүлдегерді 5 мың доллармен марапаттады. Сыйақыларды Олимпиадалық комитеттің бас хатшысы Андрей Крюков Алматыдағы жиында салтанатты түрде табыс етті.
– Ұлттық Олимпиадалық комитеттің атынан Кеңес Рақышев бастаған Қазақстан бокс федерациясын, бапкерлер құрамын және спортшыларды әлем біріншілігінің медальдарымен құттықтаймын. Бұл нәтиже Олимпия ойындарынан кейін федерация қайта құрылып, кадрлық өзгерістер енгізіліп, жаңа жаттықтырушылар штабымен бірге қателіктермен жұмыс істеп, қорытынды шығарғанын көрсетеді. Бұл жеңістер әрбір отандық жанкүйер үшін маңызды болды, бүкіл ел боксшылардың жетістіктеріне қуанды. Бірақ әрбір жеңіс пен спорттық жетістіктің артында үлкен команданың – жаттықтырушылардың, спорт дәрігерлерінің, федерацияның орасан зор еңбегі тұрғанын атап өткім келеді. Біз бүгін марапатталатын команданың әр мүшесінің, соның ішінде жеке бапкерлердің, дәрігерлердің, массажшылардың және басқа мамандардың үлесін бағалаймыз, – деді Андрей Крюков.
– Барлық боксшылардың атынан Мемлекет басшысына спортшыларға қолдау көрсетіп, елімізде спортты дамытуға көңіл бөліп отырғаны үшін, сондай-ақ жаттығу жұмыстары мен жарыстарға қатысуымызға барлық жағдайды жасап, ел намысын абыроймен қорғауға жігерлендіріп отырған біздің бокс федерациямыз бен Ұлттық Олимпиадалық комитетке алғыс білдіргім келеді. Біздің қайсымызды алып қарасаңыз да, әлем чемпионатына тек жеңіс үшін аттандық. Бәріміз бірдей үмітті ақтай алмасақ та, ел намысын абыроймен қорғадық деп ойлаймын. Қазіргі таңда спортшылардың бәріне жақсы нәтижеге қол жеткізу үшін барлық жағдай жасалғанын білеміз және бұдан кейін жаттығуымызды күшейтіп, бұдан да биік белесті бағындырып, қазақстандықтарды қуантуға барымызды саламыз. Баршаңызды Тәуелсіздігіміздің 30 жылдығымен құттықтаймын! – деді бокстан құрама капитаны Абылайхан Жүсіпов.
Айта кетейік, келесі жылы боксшыларды бірқатар ірі жарыс күтіп тұр. Олардың ішіндегі ең маңыздысы – қыркүйекте Қытайдың Ханьжоу қаласында өтетін Жазғы Азия ойындары.
