Талап тас жарады

Жамбыл өңірінің оқушылары республикалық ғылыми жобалар жарысында командалық бірінші орынды иеленді.

Жақында Алматы қаласында өткен республикалық ғылыми жобалар жарысына облыстан 36 оқушы қатысты. Оның 20-ы жүлдегер атанып, 1 оқушы алтын, 5 оқушы күміс, 14 оқушы қола медальмен марапатталды. Атап айтсақ, облыс орталы­ғындағы №31 орта мектептің оқушысы Қуат Қабидың техника саласы бойынша қорғаған ғылыми жобасы үздік деп танылып, алтын медальмен марапатталды. Ал облыстық «Да­рын» мектеп-интернатының оқушысы Махамбетәлі Темірлан қолданбалы математика бойынша күміс медальге ие болды. Бір айта кетерлігі, осы білім ордасының тағы 3 оқушысы күміс, 3 оқушысы қола медальге ие болып, мектептің атына заты сай екенін дәлелдеді. Облыстағы дарынды оқу­шылар республикалық ғылыми жарыстардан ешқашан құрқол қайтқан емес. Мысалы, 2007, 2008 және 2009 жылдары командалық есеп бойынша 2-ші, 2010, 2011 жылдары 3-ші, ал 2012 жылы 2-ші орынды иеленсе, өткен жылы облыс командасы командалық есепте тұңғыш рет 1-ші орынға көтерілді. Сөйтіп, «2013 жыл­ғы республикалық ғылыми жарыстың үздік командасы» атанды. Енді, міне, сол жеңістің кездейсоқтық емес екенін терең білімдерімен, ұшқыр ойларымен тағы дәлелдеп отыр. Көсемәлі СӘТТІБАЙҰЛЫ, «Егемен Қазақстан». Жамбыл облысы.