Ақтауда есепшілерге айыппұл салынды

Маңғыстау облысының Ақтау қаласында биыл алиментті уақытылы есеп-шотқа аудармаған 13 есепшіге айыппұл салынды. Бұл туралы «Хабар» телеарнасы хабарлады. Сот орындаушыларының айтуынша, есепшілердің бірқатары өз жұмыскерлерін жасырған. Тіпті олардың жұмыстан шығып кеткенін тиісті орынға хабарламаған көрінеді. Жалпы, Ақтау қаласында туған баласынан безіп, алимент төлемей жүрген 5 мыңға жуық әке бар екен. Соның салдарынан бейкүнә сәбилер зардап шегуде. Ал өткен жылы борышкерлердің жалақысынан ай сайын алимент төлемдерін ұстауға құлықсыздық танытқан 40 есепші әкімшілік жауапкершілікке тартылған. «Кеден департаментінің есеп бөлімі борышкердің жұмыстан шығып кеткенін сот орындаушыларына хабарламаған және атқару құжатын тиісті орынға бір ай мерзім ішінде қайтармаған. Осыған байланысты есеп бөліміндегі жауапты тұлға әкімшілік жауапкершілікке тартылды», - дейді облыстық сот актілерін орындау департаменті алимент өндіру бөлімінің басшысы Мөлдір Қуанова. Әмірхан Алмағанбетов. Дереккөз: «Хабар» телеарнасы. Фото: 1Tv.ru.