Туризм • 23 Қараша, 2021

Туысқан елден үйренеріміз көп

283 рет көрсетілді

Мәліметтер бойынша туризмді де тұралатып тастаған індет алдында Түркияға 45,8 млн саяхатшы келіп, туристердің ең көп келетін елдер арасында алтыншы орынды алыпты. Біздің елімізден де жылына 400 мыңға жуық адам осында демалады екен.

Қай жағынан алып қарасаң да, Түркияның туризм орталығы болмауы мүмкін еместей көрінеді. Табиғаты жайлы, жылы. Елдің төрт жағында төрт теңіздің толқыны тулап жатыр. Қара теңіз, Мәрмәр мен Эгей теңіздері және Жерорта теңізінің жағалаулары да жан рақаты. Ежелгі тарихы мен өркениеттердің жасампаз мұрасы да осы елде тоғысқан. Жаһанның жеті ғажабының екеуі Артемида храмы мен Бодрумдағы Галикарнас мавзолейі – туризмнің алтын сандығы. Ежелгі Рим, ежелгі грек өркениетінің іздері осы топырақта жатыр. Оны бүгіндері туризмнің тамаша нысандарына айналдырып жіберген түріктердің іскерлігіне таң-тамаша қаласың. Әйтпесе, таудан қашалған будданың мүсіндерін жарып жіберген ауғандықтар да бір мұсылман баласы емес пе?!

Ең бастысы, бардың берекесін пай­далана білуде. Байқап отырсақ, түр­кітілдес елдердің арасында түр­кі тілін, мәдениетін дамытуда ел­ші­­ліктерден де бөлек, бірнеше халықаралық ұйым еңбек етеді. Түрік кеңесі, ТИКА, ТҮРКСОЙ тағы басқа халықаралық ұйымдар мен бизнес-құрылымдардың тірліктері әртүрлі салаға лайықталған, алайда айналып келгенде барлығы да елдегі туризмнің дамуына атсалысады. Ер Түріктің абыройына қызмет етіп жатыр. Қалай риза болмассың.

Саясатты қоялық. Осыдан бірнеше жыл бұрын Осман империясының сұлтаны Сүлеймен туралы сериал шығарып, көптің назарын өзіне аударды. Әсем киносымен тарихын жаңғыртты. Туризмді дамытатын мәдениетті дәріптеуде бұл өте өтімді қадам болды. Теледидарын қосып қарасаң, әлемнің отыз тілінде сайрап тұр. Халыққа қызметінде кінәрат жоқ, көлік-қатынас құралдары күні-түні тынбастан сартылдап жүріп тұр. Кешегі індет кезінде де тез есін жия қойды. Енді туристер шоғырланып жүруге қорқатын болды, сол себепті шағын топқа арналған, оқшау демал­ғы­сы келетіндерге жағдай жасап үл­гер­ді.

Табысы туристің қаражатына қа­тыс­ты болса да, саяхатшылар кел­ді деп, солардың жолында өзінің құндылығын тәрк етіп жатқан түрік жоқ. Еуропалықтардың нөпірі басса да, жағалауда, болмаса көшесінде, базарларында, музейлер мен басқа да демалыс орындарында ашық-шашық жүрген ешкім жоқ. Мешіттерге басын бүркеп, аяқ киімін шешіп кіруге де үйреткен. Бұлармен тіл табысу да қиынға түспейді, қызмет көрсету саласындағылардың бәрі ағылшынша, немісше, орысша да сайрап тұр. Бұл елдің туризмі қалай дамыды деген оймен интернет ақтарғаным бар. 1961 жылы немістермен екіжақты ке­лісімге қол қойып, түрік жұ­мыс­шы­ларын шақырады. Сол екпін­мен алды 7 мың түрік Германияға атта­нады. Немістердің де бөтен ел­дің жерімен, мәдениетімен та­ны­­суға қызығушылық пайда бола­ды. Алғашқы туристердің басым көпшілігі ФРГ-ден келгендер болыпты. 1972 жылы туристік фир­ма­лардың қызметі туралы заң қа­был­­данады. Араға он жыл салып туризмді дамытуға түбегейлі кірі­седі. 1990 жылдары Кеңес Одағы құ­ла­ғанда, оның құрамында болған елдердің де алдында жол ашылып, түрік тауарларының бәсі артады.

Мұның бәрін не үшін айтып отырмын. Індет алдында бір жарым айдай осы елде болған едім. Тағы да жолым түсті. Бір жағы білімімді көтеріп, екін­ші жағынан алғанда демалып та жа­тыр­мын.

Осының алдында шашымды ал­дыр­мақ болып, шаштаразға кір­ген­мін. Жергілікті тұрғындардың бірнешеуі де кезекте тұр екен. Менің бөтен жер­лік екенімді біліп, «қонақсыз ғой» деп кезексіз жіберді. Демалыс болса да үйден қырық қадам ұзаған адам мүсәпір демекші, қарапайым жолау­шы үшін алтын құмды жағалау, те­ңіз­дің асау толқындары мен сол теңіздің үс­тінде қалықтаған кемелер ғана емес, жай адамдардың ықыласы да көңілді көркейтеді.

Халықаралық тәжірибеге қарап отырсақ, туризмді дамыту үшін аса көп уа­қыт қажет емес сияқты. Ақыл­мен ба­ға­лай білсек, Қа­зақ­стан­ның да ту­ристерді тартар жері жоқ емес. Тек табиғи байлығы емес, дәстүрін, әдет-салтын да туризм нысанына ай­нал­ды­ру­ға болады екен. Адамдары әрлі-бері саяхаттап, сапырылысып жатқан үлкен көштен қалып, саланы дамытуда кенжелеп қалуымыздың себебі неде деген сауалыма жауап іздеп жүрмін.

 

Амангелді Кеңшілікұлы

Соңғы жаңалықтар

2186 адам коронавирустан жазылып шықты

Коронавирус • Бүгін, 09:30

Елорда «жасыл» аймаққа өтті

Коронавирус • Бүгін, 09:13

1/16 финалға шыға алмады

Теннис • Бүгін, 08:45

«Реал» – Суперкубок иегері

Футбол • Бүгін, 08:40

Андеркардта күш сынасады

Спорт • Бүгін, 08:37

«Алтын тай» Аягөздің еншісінде

Аймақтар • Бүгін, 08:32

Ұқсас жаңалықтар