Тәуелсіздіктің 30 жылдығы • 24 Қараша, 2021

Тәуелсіздіктің алтын бесігі

195 рет көрсетілді

Тәуелсіздіктің отыз жылдығы мен Қазақстан Республикасының Тұңғыш Президенті күніне орай Қазақстанның Тұңғыш Президенті – Елбасы кітап­хана­сының музейінде Алма­ты қаласы әкімдігімен бірле­сіп өткізген «Алматы − Тәуел­сіз­діктің алтын бесігі» атты егемен ел шежіресін баяндаған көрме ашылды.

Мазмұнды іс-шара Елбасы кітапхана­сының «Қазақстан жолы» жобасы аясында ұйымдастырылған, оның мақсаты – азаттықтың алғашқы арайлы таңын қарсы алған Алатаудың етегіндегі әсем шаһардың орны мен рөлін жарқырата көрсету.

Айтулы көрменің ашылуында Ел­басы кітапханасының директоры Бақыт­жан Темір­болат азаттықтың алтын бесігіне айнал­ған – Алматының көркем келбеті мен рөлі туралы салмақты сөз қозғады. «Дәл осыдан 30 жыл бұрын Алматыда 1991 жылы 1 желтоқсанда – Президент сайлауы, 10 желтоқсанда – Мемлекет басшысының ресми ұлықтау рәсімі және 16 желтоқсанда – Қазақстан Тәуелсіздігін жариялап, дербес еліміздің негізі қаланды» деді ол.

Одан кейін Алматы қаласының әкімі Бақытжан Сағынтаев көр­меге ұсы­ныл­ған экспозициялар мега­полистің Тәуелсіздігіміздің отыз жылдығындағы жетістіктеріне арнал­ғанын атап өтті.

− Ару Алматының еліміздегі орны бө­лек, оны Елбасы Нұрсұлтан Назар­баев­­тың өзі белгілеп берген. Тәуел­сіздігі­міз алдымен Алматыда жарияланды. Мем­лекетімізді бү­гінге даму дең­гейіне жеткіз­ген – экономикалық-әлеуметтік, саяси ре­фор­малардың бәрі Алматыдан басталды. Елбасының шешімімен ел астанасы Алматыдан Ақмолаға көшірілді. Бірақ бұ­­дан Алматы ұтылған жоқ. Тұңғыш Пре­­зи­­ден­тіміздің қолдауымен Алматының жаңа мәртебесі бойынша заң қа­былданды» дей келіп, азаттық жылдарындағы табиғаты көркем қаланың экономикасына тоқтал­ды. Мәселен, алып шаһардың экономикасы 1993 жылдағы 2,1 млрд теңгеден 2020 жылы 13,5 трлн теңгеге дейін өссе, жалпы өңірлік өнім жан басына шаққанда 342,5 АҚШ долларынан 16,7 мың АҚШ долларына дейін артқан. Халық саны 1991 жылғы 1 134 мың адамнан 2021 жылы 2 млн адамға дейін көбейген.

1

Егемен елдің жүріп өткен жолын баян еткен көрме үш бөлімнен тұрады, біріншісі − «Тәуелсіздіктің бастауында» деп аталады, оған 1986 жылғы Желтоқсан оқиғасы мен 1991-1997 жылдардағы оқиғалар хроникасы, сондай-ақ Алматы қала­сында қа­былданған маңызды тарихи шешімдер туралы материалдар кешені ұсынылған. Ал «Қазақстан жолы: Алматының 30 жылдағы жетіс­тіктері» бөлімінде мегаполистің тәуел­­сіздік жылдарындағы әлеумет­тік, эко­но­микалық, мәдени және спорт жетістіктерімен танысасыз. Үшінші – «Біздің бола­­шағымыз: Алматы-2050 стра­те­гиясы» бөлімінде, «Алматы – шетсіз қала», «ақылды» қала, тең мүмкіндіктер қаласы, қауіп­сіз, жасыл қала және жаһандық іскер­лік орталық секілді шырайлы шаһар­дың ұзақ мерзімді дамуының басты бағдарлары мен стратегиялық басымдықтары көрсе­тілген.

Мәдени шараға Алматыдан зиялы қауым өкілдері де арнайы келіпті, солардың іші­нен белгілі ақын, Қазақстан Жазушылар одағының төрағасы Ұлық­бек Есдәулет ағамызды сөзге тарттық.

− Егер біз Қазақстан дейтін Ота­ны­­мыз­ды қыранға теңесек, оның қонып-ұшатын тұғыры – Алматы. Егер біз Қазақстанды тұлғалы қай­раткерге теңейтін болсақ, оның ал­ғаш­қы дүниеге шыр етіп кел­ген­де­гі алтын бесігі – Алматы. Егер біз Қазақстанды арынды, асау толқын­ды өзенге теңейтін болсақ, оның тұнық бастауы, қайнар көзі тағы да Алматы деп айтуға болады. Бұл біздің мәдениетіміз бен әдебиетіміздің өсіп-өнген, дамуы мен қалыптасуына аналық құшағын ашқан игілікті мекен болды» деп шежірелі шаһар туралы парасатты ой толғады.

Айта кетейік, көрме алдағы жыл­дың 28 қаң­тарына дейін жалғасады.

Соңғы жаңалықтар

ШҚО-да алып бала дүниеге келді

Аймақтар • 27 Қаңтар, 2023

Ұқсас жаңалықтар