Қоғам • 24 Қараша, 2021

Мүгедектік жәрдемақы ең төменгі жалақыға да жетпейді – депутат

Бүгінгі таңда Қазақстанда ерекше қажеттіліктері бар 702 мың адам тұрады. Бұл туралы ҚР Парламенті Мәжілісінің депутаты Жанат Омарбекова ҚР Премьер-Министрінің бірінші орынбасары Әлихан Смайыловқа жолдаған депутаттық сауалында айтты, деп хабарлайды Egemen.kz.

Ботакөз БАҚБЕРГЕН

«Бүгінгі таңда Қазақстанда ерекше қажеттіліктері бар 702 мың адам тұрады, оның ішінде жұмыс істейтіндер – 126 мың адам. Мүгедектердің құқықтары туралы Конвенция қатысушыларды мүгедектердің басқалармен тең дәрежеде өмір сүру құқығын тиімді жүзеге асыруын қамтамасыз ету үшін, мүгедектердің олар үшін жеткілікті өмір сүру деңгейіне құқықтарын қамтамасыз ету және көтермелеу шараларын қабылдауға барлық қажетті шараларды қабылдауға міндеттейді», деді Жанат Омарбекова.

Мемлекеттік әлеуметтік жәрдемақылар әлеуметтік қорғау жүйесінің бірінші (базалық) деңгейін білдіретіні атап өтілді. Көрсетілген жәрдемақыларға еңбек өтілінің және республикалық бюджеттен төленетін табысының болуына қарамастан, белгіленген тәртіппен мүгедек деп танылған барлық адамдардың құқығы бар.

«Қазақстан Республикасында мүгедектігі бойынша және асыраушысынан айрылу жағдайы бойынша Мемлекеттік әлеуметтік жәрдемақылар туралы» Заңға сәйкес жалпы ауруы бар мүгедектерге мүгедектігі бойынша айлық жәрдемақылар мынадай мөлшерлерде тағайындалады:

Бірінші топқа – 65 860 теңге;
Екінші топқа – 52 483 теңге;
Үшінші топқа – 35 675 теңге.

Ең төменгі күнкөріс деңгейінің өсуіне байланысты олардың мөлшері жыл сайынғы индекстеуді ескере отырып, жыл сайын инфляция деңгейіне 5%-ға көтерілуіне кепілдік беріледі.

«Пандемия, экономикалық дағдарыс және инфляция әлеуметтік маңызы бар өнімдерге, дәрі-дәрмектерге бағаның өсуіне әкелді және бұл 5% осы шығындардың кем дегенде бір бөлігін қамтымайтынын мойындау керек. Бұл ретте жылдық инфляция 8,9% деңгейінде сақталады. Бүгінгі таңда үшінші топтағы мүгедектің жәрдемақысы ең төменгі жалақы – 42 500 теңгеге жетпейді. Сонымен қатар қосымша кірісі жоқ 500 мыңнан астам азамат осы ең төменгі жәрдемақыға ие болуы керек», деп толықтырды Жанат Омарбекова.

Күннің маңызды және өзекті жаңалықтарын «Егемен Қазақстан» телеграм каналынан оқыңыз