Ведомствоның мәліметінше, 23 қарашада сағат 00:10-де Жақсы аудандық ПБ кезекшілік бөліміне Перекатное станциясының тұсында, «Екатеринбор-Алматы» автожолының 967 шақырымында жол-көлік оқиғасы болғаны туралы хабар келді.
Анықталғандай, Қостанай қаласы бағытында жүріп бара жатқан «Hyundai Sоlaris» автокөлігінің 52 жастағы жүргізушісі көлік тізгінін басқара алмай, қарсы бағытта келе жатқан «Audi В-4» көлігімен бетпе бет соқтығысты.
Жол апаты салдарынан «Hyundai Sоlaris» көлігінің жүргізушісі мен жолаушысы оқиға орнында көз жұмды. Ал, Атбасар қаласының тұрғыны басқарған «Audi В-4» көлігінің 59 жастағы жүргізушісі мен екі жолаушысы, сондай-ақ, «Hyundai Sоlaris» көлігінің тағы бір жолаушысы түрлі дене жарақатымен ауруханаға түсті.
«Қазіргі уақытта осы оқиғаға байланысты Қылмыстық кодекстің 345-ші бабының 4-ші бөлігі «көлік құралдарын басқаратын адамдардың жол жүрісі немесе көлік құралдарын пайдалану қағидаларын бұзуы» бойынша сотқа дейінгі тергеу басталды. Сараптама тағайындалды», деп қосты ведомстводан.
