Қызылордада құрылысқа жауапты басшылар сотталды

Қызылорда облысында «Бушара» түрік компаниясының басшылары сотталды. Бұл туралы «Астана» телеарнасы хабарлады. Аталған аймақтағы аспалы көпірді салуды міндетіне алған «Бушара» түрік компаниясы жалған құжат дайындап, мемлекетке 18 млн.теңгеден аса шығын келтірген. Сол жалған құжатта  бұл нысанның мерзімінен бұрын салынғаны көрсетілген екен. Алайда, тексеру кезінде аспалы көпір құрылысының аяқталмағаны, оған сапасыз материал пайдаланғаны анықталды. Осы келеңсіздікке тікелей кінәлі Зия Метин мен Кетен Ердоған сот үкімімен 5 жылға бас бостандықтарынан айырылды. Сондай-ақ,  жалған мәліметтер енгізілген ресми құжаттарға қол қойған техникалық қадағалау мекемесінің бас маманы  Аппазов та шартты түрде 5 жылға сотталды. Облыстық экономикалық қылмысқа және сыбайлас жемқорлыққа қарсы күрес департаментінің аға тергеушісі Руслан Мұсабековтің айтуынша, облыстық жолаушылар көлігі мен автомобиль жолдары басқармасының бұрынғы басшысы және оның орынбасары мен бас маманы да жоғарыдағы құрылыстың сапасына кінәлі болған. Бірақ, бұлар рақымшылық заңына сәйкес,  жазаға тартылмаған екен. Әмірхан Алмағанбетов. Дереккөз: «Астана» телеарнасы. Фото: «Хабар» телеарнасы.