Қоғам • 09 Желтоқсан, 2021

Ерекше жандарға қамқор айрықша шаһар

Елбасының ерекше туындысы саналатын бүгінгі елорда саламатты ұлт қалыптастырудың соны соқпағына түсті. Әсіресе ерекше жандардың ем-домына, оларды оңалту жұмысына баса мән беріліп келеді. Мүмкіндігі шектеулінің мүмкіндігін шектемейтін шаһардағы басты мақсат – қоғамның қамқорлығы мен жан жылуын тарата білу болып отыр. Есесіне, айрықша қамқорлықты қажет ететін қала тұрғындары шарапаты мол істің шапағатын сезінеді.

Рауан ҚАБИДОЛДИН

Бүгінде Нұр-Сұлтан қаласында оңалту орталықтарының желісі айтарлықтай кеңейтілді. Елорда әкімдігі ерекше қажеттіліктері бар азаматтарды оңалту үшін жағдай жасау жұмыстарын жүйелі негізде жүргізіп жатыр. «Ерекше қажеттіліктері бар азаматтарды әлеуметтендіру және оңалту үшін жағдай жасауға ерекше назар аударамыз. Мысалы, биыл жазда көру қабілеті бұзылған балаларға арналған мамандандырылған балабақша ашылды (Кенесары көшесі, 9/1, Сарыарқа ауданы). Балабақшада педагогтермен қатар медицина қызметкерлері де балалармен айналысады. Мекемеде физиотерапия, логопед-дефектолог, офтальмолог және тағы басқа кабинеттер бар», деді Нұр-Сұлтан қаласының әкімі Алтай Көлгінов.

Шаһар аумағында 29 «Үйдегі дәрігер» нысаны ашылды. Жаңа үйлердің бірінші қабаттарында «қадамдық қолжетімділік» қағидаты бойынша балаларға арналған шағын орталықтар, оңалту орталықтары, балабақшалар, медициналық орталықтар ашылады. Бұған қоса, былтыр елордада БЦП, аутизм, даун синдромы және тағы басқа диагноздары бар балаларды оңалтумен айналысатын бірқатар ірі оңалту орталықтары халыққа қызмет көрсете бастады.

№1 көпбейінді қалалық балалар ауруханасының базасында бір жылдан бері «Қамқорлық» оңалту орталығы жұмыс істейді. Бұл орталық нейро-ортопедиялық аурулары, оның ішінде церебралды сал ауруы бар балаларды оңалтудың әлемдік және отандық ең озық әдістерін жинақтауға арналған. Айта кету қажет, осы оңалту орталығы Қазақстан Республикасының Тұңғыш Президенті – Елбасы Нұрсұлтан Назарбаев Қоры мен «Самұрық-Қазына» АҚ арасында қол қойылған меморандум аясында қызмет көрсете бастады. Бұл орталық қолжетімді оңалтуды дамытудың озық үлгісі саналады. Себебі осы орталықта нейро-ортопедиялық аурулары бар, соның ішінде церебралды сал ауруы бар балаларды оңалтудың әлемдік үздік әдістемелері мен заманауи тәсілдері қолданылады. Кішкентай науқастарды емдеу кезінде мамандар көпсалалы тәсілге жүгінеді. Дәрігерлер аурудың ерекшелігін ескере отырып, әр баланы қалпына келтірудің жеке бағдарламасын әзірлейді. Тіпті бірегей медициналық жабдықтар саналатын костюмдер, жаттығу құралдары, жаяу жүру дағдылары және тірек-қимыл аппараты аурулары кезінде омыртқа мен буындардың қимылын қалпына келтіретін құрылғылар қолданылады. Бұған қоса, емдік-дене шынықтыру (ЕДШ), физиотерапия, жарықпен емдеу, су массажы, логопед, психолог, дефектологпен күнделікті жеке сабақтар қарастырылған. Осы арқылы жыл сайын 600-ге жуық баланы қосымша тегін медициналық көмекпен қамтуға мүмкіндік пайда болды.

Міне, ерекше жандардың өмірлік мұң-мұқтажын елеп-ескерген ел астанасында осындай игі істер атқарылып жатыр.

Күннің маңызды және өзекті жаңалықтарын «Егемен Қазақстан» телеграм каналынан оқыңыз