Өңірге жұмыс сапары барысында Қырымбек Елеуұлы жуырда ғана бой көтерген «Анаға тағзым» тәрбие орталығында болып, ел Тәуелсіздігінің 30 жылдығына арналған «Тәуелсіздікке тәубе» салтанатты шарасына қатысты. Іс-шара аясында қазақ, өзбек, орыс, дүнген, тәжік, башқұрт сияқты этнос өкілдері әзірлеген ұлттық тағамдардың фестивалі өтіп, көпбалалы аналардың қатысуымен мерекелік дастарқан жайылды. Сонымен қатар «Асыл әжелер» ансамблінің мүшелері және Ы.Дүкенұлы атындағы Тараз қалалық Мәдениет үйінің өнер шеберлері өз өнерлерін ортаға салды. Кездесу барысында «Анаға тағзым» орталығының директоры Эльмира Мырза-Ғали мекеменің қызметі қоғамдағы әйелдердің мәртебесін арттыруға, халқымыздың салт-дәстүрлерін ескере отырып, болашақ аналарды тәрбиелеуге бағытталғанын айтты. Осы орайда, Мемлекеттік хатшы Қырымбек Көшербаев ана мен баланы қолдау мемлекеттің әлеуметтік саясатының басым бағыттарының бірі екенін атап өтті. «Ел болашағы бесіктен басталады. Ана мен бала денсаулығын қорғау Мемлекетіміздің стратегиялық дамуының негізгі басым бағыты болып табылады. Көпбалалы аналарға жан-жақты қолдау көрсету шаралары жалғаса береді», деді Қырымбек Елеуұлы.
Өңірге жұмыс сапары аясында еліміздің Мемлекеттік хатшысы Тараз қаласындағы «Баласағұн» орталық концерт залында өткен ел Тәуелсіздігінің 30 жылдығына арналған салтанатты іс-шараға қатысты. Мерекелік жиында Қырымбек Көшербаев жамбылдықтарды мерейлі мерекемен құттықтады. Нұрсұлтан Әбішұлының болашақты болжап, келешекті көре білген көреген саясатының арқасында тәуелсіздікпен бірге қоғамның тұтастай жаңаша ойлау жүйесі қалыптасты. Тәуелсіз Қазақстанның туын тіктеп, шекарасын шегендеп, әлемдік аренада өз орнын ойып тұрып алуына Тұңғыш Президент – Елбасы Нұрсұлтан Әбішұлы Назарбаев ерен еңбек сіңірді. Талай сындарлы сәтте елімізді заманның дауылы мен жауынына ұрындырмай, аман алып шықты. Ал Мемлекет басшысы Қасым-Жомарт Кемелұлы Тоқаев Елбасы қалыптастырған даңғыл жолды «Сабақтастық. Әділет. Өрлеу» принциптерімен лайықты жалғастырып келеді. Осылайша, біз ғасырға пара-пар қысқа мерзімде жасампаздық жолына түсе білдік», деді Қырымбек Көшербаев өз сөзінде. Сондай-ақ Мемлекеттік хатшы өз сөзінде барша қазақстандықтың тәу етер тұғыры – тәуелсіздіктің құндылығын бүгінгі өскелең ұрпақ жете түсініп, бағалауы керектігін баса айтты. Сонымен қатар еліміздің әлеуметтік-экономикалық дамуына Жамбыл облысының да ерекше үлес қосып келе жатқанын атап өтті. «Бүгінгі ұрпақ тәуелсіздік киесін қастерлеп, мәртебемізді асқақтатқан азаттықтың қадірін бағалай білуге, сол арқылы ұлт пен тарих алдындағы жауапкершілігін жете сезінуге тиіс. Біздің алдымызда тәуелсіздік сыйлаған даңғыл жол жатыр. Сол жолда жаңа асуларды бағындыру міндеті тұр. Тағдыры ортақ тұтас халқымыздың татулығын сақтау – біздің басты мақсатымыз», деді Мемлекеттік хатшы жұртшылықпен жүздесуінде.
Жамбыл облысының әкімі Бердібек Сапарбаев өңір халқын ел Тәуелсіздігінің 30 жылдық мерекесімен құттықтап, облыстың жетістіктерін атап өтті. «Отыз жылдың әр сәті – біз үшін жеңіс, әр жылы – тұтас дәуір. Осы тәуелсіздік дәуірінде еліміздің Тұңғыш Президенті – Елбасы Нұрсұлтан Әбішұлы Назарбаевтың еңбегі зор. Сол себепті де «Тәуелсіздік пен Елбасы» сөзі үнемі қатар жүреді. Тәуелсіздіктің алғашқы жылдары ел үшін де, ер үшін де оңай болған жоқ. Осындай қиын-қыстау кезеңде, елі үшін ері тарихи шешімдер қабылдап, болашақты болжай білді. Сындарлы саясат пен нақты шешімдердің арқасында Қазақстанды қиындықтардан алып шықты. Тұңғыш Президентіміздің сындарлы саясатының арқасында әлемдік саясатта дамудың «Қазақстан жолы» атты моделі қалыптасты. Бүгінде осы дамудың «Қазақстандық жолы» Мемлекет басшысы Қасым-Жомарт Тоқаевтың мемлекеттік бағдарында ұтымды сабақтаса отырып, ел тарихының өрлеуінде әрі қарай жалғасын табуда», деді Б.Сапарбаев. Өз сөзінде облыс әкімі Тәуелсіздіктің 30 жылында Әулиеата халқының саны 1 миллион 150 мыңға көбейгенін, халықтың өмір сүруінің орташа жасы 63,5 жастан 71 жасқа ұзарғанын, осы жылдары облыс бюджеті 222 есеге өсіп, 2,2 миллиард теңгеден 481 миллиард теңгеге жеткенін және өзге де әлеуметтік-экономикалық жетістіктерді атап өтті.
Салтанатты іс-шарада Мемлекеттік хатшы Қ.Көшербаев Президент Қасым-Жомарт Тоқаевтың Жарлығымен берілген мемлекеттік наградаларды өз иелеріне тапсырды.
Жамбыл облысы
