Аталған құжат жұмыс беруші мен еңбек ұжымдары арасындағы еңбек қатынастарын және әлеуметтік-экономикалық мәселелерді реттейді. Сондай-ақ қосымша жеңілдіктер мен кепілдіктер белгілейді, кәсіпорынның тиімді жұмысын қамтамасыз ету мақсатында тараптардың құқықтары мен міндеттерін ажыратады. Шарт 2022 жылдың 1 қаңтарында күшіне енеді. 30 қарашада екіжақты комиссия отырысында ұжымдық шарттың негізгі мазмұны мен құрылымы қабылданды.
Кәсіподақ ұйымдарының өкілдерімен ұжымдық шарт жобасын талқылау барысында оған мынадай жаңашылдықтар енгізілді: еңбек міндеттерін орындау кезінде қаза тапқан қызметкердің отбасына пәтер сатып алу; ер адамдарға 3 жасқа дейінгі бала күтімі бойынша жәрдемақы төлеу (ерекше жағдайларда, екіжақты комиссияның шешімі бойынша); жұмысшы ерлі-зайыптылардың біреуін жұмыста қалдыру басым құқығы (ерлі-зайыптылардың екі жұмыс орны да қысқартуға ұшыраған жағдайда); медициналық скринингтен өту үшін ақылы демалыс беру (жылына 3 жұмыс күні); 12 аптаға дейінгі мерзімде жүктілік бойынша есепке тұру үшін ақылы демалыс беру (3 жұмыс күні); төтенше жағдай (өрт, су тасқыны) болған жағдайда тұрғын үйді қалпына келтіруге 1 млн теңгеге дейін пайызсыз несие төлеу. Бұдан бөлек, қызмет көрсету аймағын кеңейту және лауазымдық міндеттерді қоса атқару үшін қосымша ақы (кейде екі есе және одан да көп), «Кәсіпорын ардагері» атағы үшін сыйақы беру, жеке мерейтойларға (50, 55, 60 жас және т.б.) орай қызметкерлерге берілетін сыйақы ұлғайтылды.
«АрселорМиттал Теміртау» АҚ бас директоры: Бижу Наир, аталған ұжымдық шарт – бұл күнделікті қызметте басшылыққа алынатын әлеуметтік әріптестік бойынша негіз қалаушы құжат екенін айтты. «Бірінші кезекте, жаңа ұжымдық шарттың ережелерін талқылау кезіндегі конструктивті диалог үшін кәсіподақ ұйымдарының өкілдеріне шынайы алғысымды білдіргім келеді. Біз барлық еңбек ұжымдарының, кәсіподақ ұйымдарының тілектерін, жергілікті атқарушы билік пен орталық мемлекеттік органдардың ұсыныстарын тыңдап, ескеруге тырыстық. Бұл құжатта компания персоналын қолдау және дамыту, сондай-ақ кәсіпорындағы еңбек қауіпсіздігі мен еңбекті қорғауды қамтамасыз ету үшін бірінші кезектегі маңызы бар жағдайлардың барлығы ескерілген. Ұжымдық шартта алдағы үш жылға қолданыстағы шарттың қызметкерлер мен жұмыс істемейтін зейнеткерлер үшін әлеуметтік кепілдіктер мен жеңілдіктердің барлық спектрі сақталған. Сондай-ақ оған қызметкерлердің әлеуметтік қамсыздандырылуын жақсартуға тиіс қағидатты жаңа ережелер енгізілді. Біздің міндетіміз – әрбір қызметкердің әлеуетін ашуға, оның біліктілігін дамытуға, компания алдында тұрған өндірісті жаңғырту жөніндегі ауқымды міндеттерді шешуге барынша үлес қосуға мүмкіндік беретін жағдайлар жасау», деді Б.Наир.
Сонымен қатар «АрселорМиттал Теміртау» АҚ атқарушы директоры Әлішер Әбенов компания қызметкерлерді әлеуметтік-экономикалық қамтамасыз етуді арттыру бойынша практикалық шараларды белсенді қабылдап жатқанын атап өтті.
– Алдағы жылы тарифтік мөлшерлемелер мен қызметақыларды одан әрі ұлғайтуды көздейтін еңбекақыны индекстеудің түбегейлі жаңа жүйесі қолданыла бастайды. Өткен аптада ұжымдық шартқа қатысушы барлық қызметкерге 2021 жылдың қорытындысы бойынша өндірістік экономикалық көрсеткіштер жоспарын орындауына қарамастан, 100% мөлшерде сыйқақы (13 еңбекақы) төленді. Сондай-ақ жұмысшылардың әлеуметтік-тұрмыстық жағдайларын жақсарту және қауіпсіз еңбек жағдайларын қамтамасыз ету бойынша кешенді жұмыстар жалғасуда, – деді ол.
