Бірақ ә дегеннен-ақ басталуы кейінге шегеріле берді. Тек осыдан 6 жыл бұрын іргетасы қаланып, өңір тұрғындары құны қымбат бастаманың келешегіне үмітпен қарай бастаған. Ұзақ жыл күттірген зауытты ел игілігіне берудің орайы енді келіп отыр.
Облыстық индустриялық-инновациялық даму басқармасының басшысы Ринат Сұлтангереевтің айтуынша, зауыт жаңа технологияларды пайдаланып, бәсекеге қабілетті өнім шығаратын, еліміз бен өңір экономикасы дамуына тың серпін беретін ауқымды жоба. Өндіріс орны толық қуатына көшкенде 226 жаңа жұмыс орны ашылады. Ал қосалқы өндірістерде 300-ге жуық адам еңбек етеді. Ең бастысы – жергілікті тұрғындарды жұмысқа тартып, қажетті мамандарды солардың арасынан даярлауға басымдық беріледі.
– Ел Тәуелсіздігінің 30 жылдығына орай облыс тұрғындары табақша шыны зауытының күйдіру пешін іске қосу рәсіміне куә болды. Бұл жоба аясында өңірге 42 млрд теңгеден аса инвестиция тартылған болатын. Жылына 197 мың тоннадан аса өнім шығаратын кәсіпорын ел нарығын шынымен қамтамасыз етіп қана қоймай, өнімін шет мемлекеттерге экспорттайды. Шыны зауытының іске қосылуы шикізаттық емес секторды дамытып, ілеспе өндірістерді құруға мүмкіндік береді. Бүгінде инвесторлармен бірлесіп композиттік материалдар мен айна өндірісі жобасын бастадық. Былтыр Қазақстан құны 65 млн доллар болатын тұрмысқа қажетті шыныларды Қытай, Германия, Өзбекстан және Түркиядан алған. Зауыт толық іске қосылғанда капиталдың басқа елдерге жіберілуін тоқтатамыз және елді Сыр бойынан шығатын әйнекпен қамтамасыз етеміз, – деді басқарма басшысы.
Orda Glass Ltd серіктестігі мен қытайлық China Triumph компаниялары бірлесіп жүзеге асырған шыны зауыты – индустрияландыру бағдарламасының негізгі жобасы. Өндірісте қолданылатын шикізаттың 90 пайызы өзімізде бар.
– Зауытта АҚШ, Италия, Бельгия, Финляндия, Қытайда шығарылған заманауи үлгідегі технологиялар қолданылады. Негізі өнімнің 70 пайызын ішкі нарыққа бағыттаймыз. Ал қалғаны шетелге жөнелтіледі. Қазірдің өзінде Өзбекстан, Ресей, Түрікменстан, Тәжікстан, Ауғанстан мен Үндістаннан тапсырыстар түсуде.
Тағы бір жаңалық – үлкен көлемді және ауыр салмақты шыны табақшаларын кесуге және тасымалдауға роботтар қолданылмақ. Қазір Қазақстанда сырттан келген 1 тонна шыны құны 300-350 доллар болса, біздің зауыт өнімінің бағасы 200-250 доллар көлемінде болады, – деді Orda Glass Ltd ЖШС басқарма төрағасы Ержан Сағынбаев.
Қызылорда облысы
