Аймақтар • 23 Желтоқсан, 2021

Самға, Саран жобасы!

52 рет көрсетілді

Қазыналы Қара­ғанды облысы еліміздің индус­трия­лық тірегі болып қала береді деуге толық негіз бар. Өңірде «АрселоМиттал Теміртау» АҚ, «Қазақмыс» сынды қала құраушы алпауыт кәсіпорындар өз алдына, өңірде басқа да өндіріс ошақтары өсіп келеді. Бұған мысал ретінде Қарағандының іргесіндегі Саран қаласында қолға алынған жобаларды алуға болады.

Бұл қаладағы бұрынғы Резина-техника бұйымдарының қаңырап бос қалған кәсіпорнының орнына жылына Yutong маркалы 1 200 автобус пен 400 бірлік техника мен арнайы көлік құралдарын шығаратын QazTehna зауыты бой көтерді. Бұл кәсіпорын өзі­нің толық қуатына жеткенінде, ондағы жұмысшылардың саны 1 мыңның шамасында болады деген болжам бар. Айта кеткен жөн болар, әлемдегі аса ірі автобус өндіруші Yutong компаниясымен бірлесе құрылған жобаның құны шамамен 11,9 млрд теңгені құрайды. Мұның 5,7 млрд теңгесі – құрылтайшының жеке қаржысы.

Мамандар қазірдің өзінде бұл жобаның аталған қала үшін «зә­кір­лі жоба» болып, облыс эконо­ми­касын әртараптандыруға да мол мүмкіндік береді дегенді нық се­нім­мен айтады.

Былтыр Қарағанды облысы­на жұмыс сапарымен келген Мемлекет басшысы Қасым-Жомарт Тоқаев облыс орта­лы­ғын­­дағы жаңадан пайдалануға бе­рілген №104 мектеп-гимназияға авто­бус сыйға тартқан болатын. Бүгінде Сарандағы зауыттың да қатысы бар сол автобус оқушы балаларға сапалы қызмет көрсетіп жүр. Бұдан бөлек, кәсіпорынның өнімдері Қарағанды және Саран қалаларындағы жолаушылар тасымалы қызметіне де пайдаланыла бастады. Аталған техника түрлері қоғамдық тасымалдау саласындағы халықаралық сапа стандарттары талаптарына толық жауап береді. Автобустар мүмкіндігі шектеулі жандарға арналған арнайы пандустармен, орындармен, электронды билет беру және бақылау жүйесімен жабдықталған.

Соңғы мәліметке сәйкес, қа­зір­гі уақытта Саран зауытының об­лыс орталығында – 24, Сәт­баев қаласында 32 автобусы жо­лау­шыларға қызмет көрсетеді. Жезқазған қаласына бөлінген 31 автобустың 20-сы жеткізілген. Сондай-ақ Солтүстік Қазақстан облысына – 100 автобус, Алматы қаласына 8 көлік жіберіліпті. Бі­лім және ғылым министрлігінің келісімі бойынша барлық облыс­тық білім басқармаларымен арада оқушылар автобустарын сатып алуға келісімшарт жобалары әзір­леніп жатқан көрінеді.

Айта кету керек, Сарандағы зауыттың конвейерінен қалалық авто­бустардың төрт моделі шыға­ды. Оның қатарында ішіне 51 адам сыятын, ұзындығы 8,5 метр­лік автобустан 103 орын­дық­ты 12 метрдей ұзын көлік­ке дейін бар. Жаңа зауыт қалалық, қалааралық және мектепке арналған автобустарды шығарумен ғана шектелмей, сонымен қатар электр автобустарын өндіруді де жос­пар­лап отыр. Ал биыл ауыр жүк техникаларын құрастыру жұ­мыстары бастау алды. Оның ішінде 40 және 60 тонна жүк көтеретін кеніш көлігінің екі түрі де болады. Жалпы, кәсіпорын басшылары Саран зауытының өнімі ел ішінде ғана сатылып қоймай, жақын шетелдерге экспортталатынын да айтады. Жаңа жобаның Қарағанды облысы экономикасының дамуына және отандық автобустар жасап шығару арқылы қоғамдық көлік қорын жаңарту және жаңғырту бағдарламасын жүзеге асыруға игі ықпалын тигізеді деген сенім бар.

Саран қаласында қолға алын­ған екінші ірі жоба – автокөлік ши­на­ларын шығаратын зауыт құ­­рылысы. Ресейлік «Татнефть» ком­­паниясымен бірлесіп жүзеге асы­­рылып жатқан бұл жобаға са­лы­натын инвестицияның жалпы көлемі шамамен 111 млрд теңгені құрайды. Бүгінде жаңа кәсіпорынның құрылысы қызу жүргізілуде. Мамандар жаңа за­уыт­тың Қазақстанның, атап айт­қанда, Қарағанды облысының автомобиль өнеркәсібін дамытуға қомақты үлес қосатынына сенімді. Жоба аясында жаңа жұмыс орындарын ашу, импортты алмастыру және экспорттық әлеуетті қам­та­масыз ету сияқты өлшемдер бо­йын­ша жұмысты ұйымдастыру жос­парда бар.

Жалпы, жоспар бойынша 2022 жылы іске қосылады деп болжанған кәсіпорын арада үш жыл өткенде өзінің жо­ба­лық қуат­тылығына толық қол жет­кіз­бек. Яғни кәсіп­орын жы­лына жеңіл көліктің 3 млн ши­насы мен жүк көлігінің 500 мың шинасын өндіретін болады. Ал жергілікті климаттың ерекшелігіне сәйкес жасалынатын Made in Kazakhstan маркалы бұл өнімдер ішкі нарықпен қатар ше­телдерге де экспортқа шы­ға­рыл­мақ.

Болашақ кәсіпорынның облыс үшін жаңа бағытты дамытуға мүмкіндік беретін маңызды жоба болғалы тұрғаны сөзсіз. Ең бас­ты­сы, зауыт іске қосылған кезде мыңнан астам жаңа жұмыс орындары ашылады. Инвестор мен жергілікті атқарушы билік арасында өткен кездесуде айтылғандай, кәсіпорында жергілікті мамандар жұмыс істейді. Сондай-ақ жаңа жұмыс орындарынан үміттілерді Татарстанда оқытып алу да даяр­лық бағдарламасы бойынша қа­рас­тырылған.

Жасыратыны жоқ, Қарағанды облысында қолға алынған жарқын жобаның «отандық өнім жоқ» деп ауызды құр шөппен сүртуді дағдыға айналдырған бәз­біреу­лер­дің аузына құм құятын түрі бар. Бір есептен мұның өзі істің қиюын тапса, индустрия әлеуетін ел экономикасының игілігі жолына жұмсауға болатынын дәлелдеп берді. Сол себепті де Сарандағы сер­пінді жобалардың өндіріс на­ры­­ғының көгінде қанаты тал­май самғай берсе екен деп тілейсің.

 

Қарағанды облысы

Соңғы жаңалықтар

Ұлы даланың ұлағаты

Аймақтар • Бүгін, 12:23

Ұстаздың аты өлмейді

Білім • Бүгін, 10:30

Карапастың қарқыны күшті

Спорт • Бүгін, 10:29

«Каспий» көш бастады

Спорт • Бүгін, 10:27

«Жас дарын» байқауы өтті

Аймақтар • Бүгін, 08:58

Элитадағы орнын сақтап қалды

Хоккей • Бүгін, 08:55

Адалдық пен шындықты шырақ етті

Қазақстан • Бүгін, 08:48

Ұқсас жаңалықтар