Орталық коммуникациялар қызметі алаңында өткен брифингте министр бұл көрсеткішке жекелеген қызмет бағыттары бойынша қолға алынған алдын алу және профилактикалық іс-шаралардың арқасында қол жеткізілгенін айтты. «Бөлімше қызметкерлері 11 мыңнан астам адамды құтқарса, 12 мыңға жуық тұрғын эвакуацияланды, 4 мыңнан астам азаматқа алғашқы медициналық көмек көрсетілді. Жыл басынан бері төтеншеліктер 76 мыңнан астам шақыртуға шыққан», деген ведомство басшысы биыл төтенше оқиғалардың кесірінен зардап шеккендердің саны 1736-ға, ал қаза тапқандардың қаралы тізімі 838-ке жеткенін де хабарлады. Түрлі апат кезіндегі материалдық залалдың өскені де байқалады. Соңғы 11 айда 354 адам қызыл жалынның құрбанына айналса, 400-ден астам тұрғын суға кеткен. Ал өндірістік апаттан 13 адам көз жұмған.
«Өкінішке қарай, биыл 2 немесе одан да көп адамның өлімі тым жиілеп кетті. Қоғамдық резонанс тудырған бұл қайғылы оқиғалар жалпы статистикаға әсер етпей қоймады. Жыл басынан бері екі рет газ баллондарының жарылысы тіркелді. Нұр-Сұлтан және Петропавл қалаларында болған осы апат салдарынан 4 адам қаза тауып, 15-тен астам тұрғын зардап шекті. Кейіннен Ақмола облысының Шортанды ауданында 6 адам, оның ішінде үш бала дәл осындай жарылыстан көз жұмды. Сондай-ақ Жамбыл облысындағы әскери қоймадан өрт шығып, 17 адам қаза тапты», деген министр қаралы оқиғаларды тізбелеп шықты.
Брифинг барысында Ю.Ильин сондай-ақ сел жүру қаупі бар кезеңде 1800-ге жуық қауіпті учаскеде жерүсті және аэровизуальді тексеру жүргізілгенін де айтып өтті. «Жыл сайын еліміздің таулы аймақтарында мұздықтардың тез еруі жаңа мұздақ көлдердің пайда болуына әкеп соғады. Көбінесе олар өте қауіпті болып табылады және сел мен көшкін құбылыстарына қауіп төндіреді», деді бұл жөнінде ол.
Қауіпті учаскелерді бақылауды селден қорғаудың жаңа технологияларын қолдана отырып, «Қазселденқорғау» арнайы бақылау және құлақтандыру қызметі жүзеге асырады. Олар халықты хабардар ету бойынша жаңа технологияларды енгізуде. «Алматы, Жамбыл, Шығыс Қазақстан, Түркістан облыстары мен Алматы қаласы – сел мен көшкін қаупіне жиі ұшырайтын өңірлер. Қазіргі таңда Қорғас, Кіші және Үлкен Алматы, Ақсай, Қарғалы өзендерінің бассейндерінде автоматты мониторинг жүйесінің 31 стансасы жұмыс істейді. Олар жағдайды бағалауға және сел ошақтарына жедел ден қоюға мүмкіндік береді. Алматы қаласы, Алматы облысы және «Қорғас» шекара маңындағы халықты қорғау және селдерден келетін залалды барынша азайту үшін Ақсай, Аюсай, Қорғас өзендерінде селден қорғау бөгеттері мен қорғаныш құрылыстарын салу жүргізілуде», деп атап өтті ведомство басшысы. Ал Алматыда жер сілкінісін ерте хабарлайтын 9 автоматтандырылған сейсмостанса орнатылған. Мұндағы құрылғылар магнитудасы 4 балл және одан жоғары жер сілкінісін ерте хабарлай алады. Жалпы, еліміз бойынша сейсмикалық қауіпті және жер сілкіністерін болжау қаупін төмендету мақсатында сейсмикалық қауіпті аймақтарда 63 стационарлық станса жұмыс істейді. Министрдің айтуынша, алдағы уақытта тағы 28 станса орнату жоспарда бар.
