Мәртебелі сыйлықты тапсыру рәсімі аралас форматта ұйымдастырылды. Келе алмаған азаматтар zoom платформасы арқылы қатысуға мүмкіндік алды. Салтанатты іс-шара барысында Олжас Сүлейменовтен бөлек, Мәскеу мемлекеттік халықаралық қатынастар институтының ректоры, Ресей Ғылым академиясының академигі Анатолий Торкунов, Ресей-Армян университетінің ректоры Армен Дарбинян (Армения), физик-ғалымдардың авторлық ұжымынан Александр Тузиков, Сергей Золотой және Сергей Кореняко (Беларусь), Астрофизика институтының директоры Гүлчехра Кохирова (Тәжікстан), Ұлттық ғылым академияларының президенттері Мұрат Жұматаев (Қырғыз Республикасы) және Ион Тигиняну (Молдова) сыйлыққа ие болды.
Жалпы, ТМД мемлекеттерінің белгілі тұлғаларына табысталып келе жатқан «Достастық жұлдыздары» мемлекетаралық сыйлығының тарихы 2009 жылдан басталады. Сол жылдың 21 мамырында ресми түрде бекітілген марапат жыл сайын лауреаттарға табысталуда. Гуманитарлық ынтымақтастық мемлекетаралық қоры тағайындайтын дәстүрлі сыйлықты иеленген азаматтарға Құрмет белгісі, арнайы диплом, куәлік және 2 миллион Ресей рублі тапсырылады.
Лауреаттарды марапаттау рәсіміне гуманитарлық ынтымақтастық мемлекетаралық қорының атқарушы директоры Анатолий Иксанов бастаған өзге де мәртебелі меймандар қатысты. Сыйлық иегерлері бейнебайланысқа шығып, ризашылығын жеткізді.
Бұдан бөлек іс-шара кезінде «Дебюттер достастығы» мемлекетаралық сыйлығы да тапсырылды. Бұл марапат қазақстандық бейнелеу өнерінің шебері Алмас Нұрғожаевқа бұйырды.
