12 Мамыр, 2010

ИМАМДАР ЖӘНЕ ИМАНДЫЛЫҚ

685 рет
көрсетілді
4 мин
оқу үшін
Бас мүфти, шейх Әбсат­тар қажы Дербісәлі хазрет Ал­матыда Нұр-Мүбәрак универ­ситетін исламтану мамандығы бойынша биыл бітіретін тү­лек­терді қызметке бөлді. 2001 жылы 1 қыр­күйекте студент­терге есігін ашқан республи­­ка­дағы бір­ден-бір жоғары білімді дін мамандарын даярлайтын оқу орнында фиһқ (мұсылман заңы), ақида (діни сенім), қасиетті Құран ілімдері, ислам философиясы, араб тілі, араб мәдениеті тілін оқыту әдісте­ме­сі секілді т.б. пәндерден египеттік және қазақстандық профессорлар дәріс оқыды. Күні бүгінге дейін осы оқу орны еліміз өте мұқтаж 150 имам­дар даярлап, қызметке аттандырды. Ал биыл университеттен атал­мыш мамандық бойынша 40 студент диплом алмақ. Соның екеуі қазірдің өзінде имамдық қызметті қоса атқарып жүр. Түлектердің дені Алматы, Павлодар, Қарағанды, Талдықорған қалалары, Алматы, Шығыс Қазақ­стан, Батыс Қазақ­стан, Маңғыстау, Атырау, Оңтүстік Қазақстан облыстарына имамдық қызметке жіберілетін болды. Университетті 5 үздік бітірушіге оқу орны жанын­дағы магистратураға құжаттарын тапсырып, бағын сынау мүмкіндігі жасалды. Универ­ситет қабырғасын­да мүбарак Құран­ды толық жаттап, шетелдер­дегі қасиетті Құран жарыстарына қатысып жүрген үздік шәкірт Құрмет Смағұлов Нұр-Мүбәрак университетіне қызметке қал­дырылды. Дінбасы Нұр-Мүбәрак Египет Ислам мәдениеті университетін бітіруші шәкірттерді жеке-жеке қабылдап, сұхбаттасты. Сөйтіп, еліміздің бар аймағына болашақ имамдарды жіберуге шешім қабылдады. Бас мүфти студенттерге респуб­ли­када атқарылып жатқан діни жұмыстар, имам қандай болу ке­рек, дін қызметінің жауапкер­шілігі, ислами ғылым, білім туралы әңгімелеп, ақыл-кеңестер берді. Дінбасы сондай-ақ, елімізде 2007 жылы ашылған “Астана” және Шымкент медреселерінің тұң­ғыш түлектерімен де кездесті. Ұшы­расудың мақсаты – түлектер білімін тексеріп, жоғарыда айтыл­ғандай қызметке бөлу. Алдымен ол Шымкент медресесінің шәкірт­тері­мен кездесті. Оңтүстіктік бола­шақ имамдар да, облыстарға атта­на­тын болды. Бір айта кететін жәйт, ҚМДБ мен Монғолия діни басқармалары өзара ынтымақтастық келісімі негізінде келген 2 шәкірт өз еліне жіберілді. Дінбасы “Астана” медресесінің де алғашқы бітірушілерімен кез­десті. Олар да еліміздің әр аймағы­на имамдық қызметке бөлінді. Шәкірттердің басым бөлігі атал­­­мыш оқу орындарын “өте жақ­сы”, “жақсы” деген бағамен тә­мәм­­даған. Атап айтар болсақ, Шым­кент медресесінің 41 түлегінің 20-сы “өте жақсы”, ал 10-ы “жақсы” деген баға алған екен. Ал Астана медре­сесін 24 шәкірт бітірсе, солар­дың 7-уі “өте жақсы”, ал 10-ы “жақ­сы” деген бағаға ие бол­ған. Атап өтерлік жәйт, бар­лық түлектер араб тілінің грам­ма­тикасын ойдағыдай меңгер­ген, қасиетті Құранды да жақсы оқиды. Үш оқу орны түлектері арасында қасиетті Құранның біраз бөлігін жақсы білетіндер көп боп шықты. Бір сөзбен айт­қанда, болашақ дін қайрат­керлері көңілден шықты. Бұл рухани өміріміздегі есте қаларлық елеулі оқиға болды. Дінбасы, шейх Әбсаттар қажы Дербісәлі хазрет облыс­тардағы өкіл имамдарға жауап­ты қызметке аттанғалы отыр­ған білімді жас маман­дарға тиісінше жағдай жасап, халықпен қалай тығыз қа­рым-қатынас орнату жолдары мен жүйелі жұмыс жасау әдістерін үйретіп, қолғабыс етуді тапсырды. Сөз соңында Бас мүфти медресе басшыларына алғысын білдіре келе, алғашқы түлектерге ел ынты­мағы мен бірлігін нығайтуға, асыл дініміздің өркениетті жолмен кең қанат жаюына аянбай қызмет ете беруге деген тілектестігін жет­кізді. Сөз соңында Елбасы мен ел қа­мын­да жүрген азаматтары­мызға аман­дық тілеп, Алла тағала елімізге абырой, ауызбірлік, бейбітшілікті нәсіп еткей деп бата берді. “Егемен-ақпарат”.