Көрмеге дайындық жайы сөз болды

Кеше Премьер-Министр Серік Ахметов Халықаралық көрмелер бюросының (ХКБ) Бас хатшысы Висенте Лоссерталеспен кездесті, деп хабарлады ҚР Премьер-Министрінің баспасөз қызметі. Тараптар Қазақстан мен ХКБ-ның Астанада ЭКСПО-2017 көр­месін өткізуге дайындық шең­берінде өзара іс-қимылы мәсе­лелерін талқылады. Премьер-Министр көр­ме­нің алғашқы нысандары құры­лы­с­ының басталу мерзімі туралы хабарлады. «Біз Мемлекет басшысына Көрменің сәулеттік жобасы тұ­жырымдамасын ұсындық. Мамырда ЭКСПО-ның алғашқы нысандарының құрылысы бас­талады», – деді С.Ахметов. Премьер-Министр көрмені өт­кі­зуді ұйымдастыру үшін бар­лық шарттардың, оның ішінде құ­қықтық жағдайлардың жасал­ғанын атап көрсетті. «Өткен жылдың аяғында көр­менің инфрақұрылымдары мен нысандарын уақытында са­лу үшін қажетті құқықтық ба­за жасайтын, сондай-ақ, ЭКСПО-2017-ні өткізуге қатыс­ты процедуралық және ұйым­дастырушылық мәселелерді шешетін заң қабылданды. Бір сөзбен айтқанда, шешілмейтін мәселе жоқ», – деп атап өтті Пре­мьер-Министр. Өз кезегінде, ХКБ басшысы Қазақстанның осы жылғы маусымда көрменің ресми туын алу үшін барлық мүмкіндіктерінің барлығына сенім білдірді. «Қазақстанның қолына ресми ту маусым айында түседі, содан кейін ЭКСПО-2017-ге қаты­сушы-елдерді шақыру бойынша бағдарламалар жү­зеге асырыла бастайтынына се­німдімін», – деп сөзін түйіндеді В.Лоссерталес. ХКБ Бас хатшысы Қазақ­стан­ға жұмыс сапарымен келді. Сапар барысында ол ЭКСПО-2017-ге дайындық жайымен танысатын болады.