Мемлекет басшысының бензин мен дизельдің бағаларын реттеу жөніндегі тапсырмалары аясында мұнай өнімдерін бөлшек саудада өткізуге шекті бағаларды белгілеу бойынша тиісті бұйрықтар қабылданды.
Осылайша, мұнай өнімдерінің бағасы:
1) АИ-80 маркалы бензин – литріне 89 теңге;
2) Аи-92 маркалы бензин – литріне 182 теңге;
3) Аи-93 маркалы бензин – литріне 182 теңге;
4) Аи-95 маркалы бензин – литріне 215 теңге;
5) Дизель отыны - литріне 230-260 теңге болды.
Нарықтағы жағдайды толық бақылауды қамтамасыз ету мақсатында сұйытылған мұнай газына уақытша мемлекеттік баға реттеу енгізіліп, литр үшін 50-75 тг диапазонына дейін төмендетумен бөлшек сауда бағасы бекітілді.
Энергетика министрлігі келесі екі бұйрықты бекітті:
1) 2023 жылғы 1 қаңтарға дейін сауда-саттық қағидаларын тоқтата тұру жөніндегі бұйрық, оған сәйкес Энергетика министрлігі сұйытылған газды электрондық сауда-саттықтан тыс өткізетін болады;
2) Сұйытылған мұнай газының шекті көтерме бағасын төмендету жөніндегі бұйрық.
Сондай-ақ, бүгінгі күні ЭСА-дан тыс ішкі нарыққа сұйытылған газды жеткізу жоспарын қалыптастыру қағидаларына түзетулер енгізу бойынша бұйрық әзірленді.
