Әріптестік байланыстар нығаяды

Қазақстан Президенті Н.На­зар­баев ұсынған «Мәңгілік Ел» жо­басы мемлекетаралық ынты­мақ­тастықты нығайту қадамдарына қуат беруде. Астаналық Ақмола облысының әкімі Қосман Айт­мұ­хаметовтің Канаданың Қазақ­стандағы Төтенше және өкілетті елшісі Стивен Миллермен кезде­суінде осы мәселелер кеңінен тал­қыға салынып, нақты шешімдер қабылданды. Қабылдауда өңір басшысы ауыл шаруашылығы мен өндіріс саласында бірлескен жобаларды жүзеге асыруда Канада Ақмола облысының сенімді әріптесі екендігін атап көрсетті. Мәселен, 2013 жылы облыстың Канадамен тауар айналымы 36 миллион АҚШ долларын құрап, 2012 жылмен са­лыс­тырғанда екі есе артық көр­сет­кішке қол жеткізілді. Айрықша көңіл қоярлық жұ­мыс­тың бірі ретінде, 2011-2013 жыл­дар аралығында етті қара мал шаруашылығын дамыту бағ­дар­ламасы шеңберінде Канададан 1800 бас асыл тұқымды мал жеткізілгені атап өтілді. Қазіргі таңда озық технология талаптарында күтімге алынған малдан жоғары өнім алынуда. Соңғы екі жылдың төл төгімі нәтижесінде қосымша табындар қатары айтар­лықтай көбейді. Бұл орайда, ше­телдік селекциядағы «Ангус», «Герефорд» ірі қара малын көп­теп сатып алған «Балқашын» асыл тұқымды зауытының, «Остро­горский», «Аршалы Агро Өнім­дері», «Сандықтау» ЖШС мен «Асыл Түлік» АҚ-тың  жақсы жұ­мыстары атап өтілді. Сондай-ақ, бүгінгі күні Ақмола облысының ауылшаруашылық тауар өндірушілерінің меншігінде жоғары өнімділіктегі «Борго», «Моррис», «Феликсикоил», «Амити», «Бюллер»  маркалы 693 бір­лік канадалық озық техника бар. Оның жалпы құны 14,8  миллиард теңгені немесе 99,3 миллион АҚШ долларын құрап отыр. Кездесуге қатысушы жер­гі­лікті тауар өндірушілер мен ауыл шаруашылығының  маман­дары Ақмола өңірі мен Кана­да ғалымдары Шортанды ауда­нын­дағы А.И.Бараев атындағы ғылы­ми-зерттеу институтының база­сында азықтық сояның аудан­дастырылған селекциясын жасауда бірлесіп жұмыс істеп келе жат­қа­нына ризашылық білдірді. Түпкі мақсат – қатал климаттық жағ­дайда маңызды өнімнің 70-75 күн­де пісіп-жетілуін қамтамасыз ету. Өз кезегінде Стивен Миллер өз елінің байырғы әріптестік байланыстарды нығайтып,  аймақ шаруалары мен кәсіпкерлер қызметін өрістетуге мүдделі екендігін мәлімдеді. Сонымен бірге, ол мемлекетаралық интеграцияны дамыту мақсатында  Ақмола облысының делегациясын Канадаға келіп қайтуға шақырды. Сондай-ақ, Канаданың Мани­тоба провинциясының делегациясын Ақмола облысы әкімінің бірінші орынбасары Рашит Әкімов қабылдады. Онда Канада Үкіметінің инвестиция мен сау­да жөніндегі бөлімінің директоры Билл Терриус озық ауыл шаруашылығы жабдықтарын жасаушылар мен экспорттаушы «Ag Growth», «Can Agro Exports», «Convey-A» компанияларының қызмет ұсынымдарын таныстырды. Бақберген АМАЛБЕК, «Егемен Қазақстан». Ақмола облысы.