Пікір • 17 Қаңтар, 2022

Бәсекеге қабілеттілігіміз арта түседі

89 рет көрсетілді

Мемлекет басшысы Қасым-Жомарт Тоқаев Мәжілістің отырысында әр саладағы өзекті мәселелерді қозғап, еліміз үшін маңызды бірқатар тапсырма берді. Қоғам дамуының өзегі болып саналатын білім саласы да қалыс қалған жоқ. Президент сапалы білімге қолжетімділікті арттыру сөзсіз басым бағыт, жоғары білімнің қолжетімділігі көкейкесті мәселе екенін атап өтті.

Әрине, Президент бастамаларын жүзеге асыру аясында жоғары білім беру мекемесі ретінде Қожа Ахмет Ясауи атындағы Халықаралық қа­зақ-түрік университетінің де атқа­рар міндеті мол. Ең алдымен, сауат­ты мектеп мұғалімдерін даярлау мәселесі. Біз бұл бағыттағы жұмыс­тарды біршама уақыт бұрын бас­тап кеткенбіз. Қазір университетте оқып жатқан білімгерлердің ба­сым көпшілігі педагогикалық ма­ман­дықтарда оқиды. Сондықтан бі­лім беру бағдарламаларын қайта қа­рап, оның сапасын көтеру, заманауи талаптарға сай ету – негізгі мақ­сат. Халықтың әлеуметтік әл-ауқа­тын көтеру үшін де жұмыс істеп жа­тыр­мыз. Әсіресе халыққа меди­ци­на­лық қолдау көрсетілуде. Уни­верситет қарамағындағы клиника-диаг­ностика орталығы бүгінде Түр­кістан қаласы азаматтарының игілігі үшін қызмет етеді. Оқу орны тарапынан халыққа пайдалы тың жобалар жүзеге асырылуда. Соның бірі – «Ана жұрттан ата жұртқа ден­сау­лық көпірі» жобасы. Түрік ынты­мақтастық және үйлестіру агент­тігімен бірлескен жоба аясында уни­верситет клиникасы заманауи стан­дарт­тарға сәйкес жаңғыртылады. Айта кетейік, жоспардың бір бөлігі орын­далып, жақында ғана ТИКА біз­дің емханаға қаржылай көмек көр­сетті. Бұл – емделушілерге сапа­лы қызмет көрсетуді одан әрі дамытады. Сондай-ақ 2022 жылдың маусымына дейін Түркиядан 45 жо­ғары санатты дәрігердің келуі жос­парланған. Бүгінде дәрігерлердің бір бөлігі келіп, қала тұрғындарын қабылдап, тегін емдеді. Осындай білікті медицина мамандарын даярлау үшін студенттерге шетелдік білім мен тәжірибені таныту ісін қол­ға алдық. Бүгінде Түркияның жетек­ші Гази университетімен бірге «Ме­дицина» қос дипломды білім беру бағ­дарламасы әзірленіп, сараптамадан өтті. Алдағы уақытта «Туризм», «Халықаралық қатынастар» және «Теология» бағыттарын да қамтимыз.

Президент үндеуінде техника­лық мамандықтарға баса назар аудару ­керек екенін айтты. Университет бұл бағытта да нәтижелі істер атқарып келеді. Стратегиялық жоспарымызда инженерия факультетін одан әрі дамытып, білім беру сапасын кө­теру міндетін алға қойдық. Өйткені өңірлерде техникалық мамандар­­­­ды даярлау – кезек күттірмейтін мә­се­ле. Осы орайда, стратегиялық жос­пар негізіндегі істер нәтижелі бас­тау алғанын айта кетелік. Мәсе­лен, инженерия факультетінің базасында Huawei компаниясымен бір­лесіп құрылған жаңа форматтағы Huawei ICT Academy зертханасы ашылды. Зертхана ІТ, цифрлық технология және телекоммуникация саласында жоғары білікті маман даярлауға мүмкіндік береді. Бола­шақта студенттерімізді Huawei ком­па­ниясының Қазақстандағы штаб-квартирасы базасында және се­ріктестер компанияларының филиал­дарында тұрақты тағылымдамалар­­ға жіберу жоспарлануда. Бұдан бө­лек, университет былтыр Түркияның ­тех­­­никалық бағыты бойынша ең ал­дың­ғы қатарлы Йылдыз техника­лық уни­­верситетімен меморандумға отыр­ды. Ынтымақтастық оқу орнын­да техникалық, инженерлік маман­дық­­тарды дамытуға жол ашты. Өзара ке­лісім аясында «Ақпараттық технологиялар» және «Электрэнергети­ка» мамандықтарын қос дипломды білім беру бағдарламасына жет­кізу жоспары бар. Сонымен қа­тар, «Электрэнергетика» бағы­ты бойын­ша Қазақстандағы осы сала­ның үз­діктерінің бірі санала­тын Ғ.Дәу­кеев атындағы Алматы энергетика және байланыс университеті­мен ын­­ты­мақтастық құрылып, келісім­шарт жасалды. Оның аясында оқу бағдарламаларын көтеру жұмысы жанданады. Айта кетерлік жайт, қа­зір­гі уақытта Халықаралық қазақ-түрік университеті, Алматы энергетика және байланыс университеті және Йылдыз техникалық университеті бірігіп, жаңа оқу бағдарламасын әзірлеп жатыр. Өңірдегі үлкен кәсіп­орындармен серіктестік нәтижесінде техникалық сала мамандарын даярлау моделі дайындалды. Ендігі кезекте, сол модельге сай білім беру бағ­дарламаларының сапасын көтеру жұмыстары жүргізілуде. Түркістан облысы әкімдігімен бірге бірнеше жобаны қолға алу жоспарланған. Оның бәрі Мемлекет басшысы тап­сырмасын жүзеге асыруға бағыт­талған. Мәселен, кәсіпкерлік және электронды сауда курстарын ұйым­дастыру, тігіншілік, кесте және қо­л­өнер шеберханасын құру, ақпа­рат­тық технологиялар (IT) және информатика курсын өт­кізу сынды жұ­мыстар күтіп тұр. Сон­­дай-ақ ро­боттехника кодтау, дә­некерлеу бо­йынша оқу шеберхана­ла­рын, FABLAB оқу зертханасын құ­ру және та­ғы басқа жобалар жүзеге ас­пақ. Мұның бәрі өңірде техникалық сала мамандарының қатарын көбейту­ге, оларды жұмыспен қамтуға оң әсе­рін тигізеді.

Президент елде шетелдік жоғары оқу орындарының 5 филиалын ашу қажеттігін айтты. Оның екеуі тех­никалық бағыттағы университет бол­мақ. Бұл шешімнің бізге де ти­гізер пайдасы зор. Әлемге танымал университеттерге қарап бой түзеп, бәсекеге қабілеттігімізді арттыру мүм­кіндігі туып отыр. Сондай-ақ уни­верситетіміз Түркі әлемі уни­вер­ситеттері одағына төрағалық жаса­ғандықтан, түркі дүниесіндегі барша мықты тәжірибені Қазақстанға алып келуге толық мүмкіндігіміз бар. Лаборатория мен кітапхана база­сын күшейту жұмыстары да шетте қалмайды. Көпсалалы университет ретінде атқаратын жұмыстар мұнымен тоқтамайды. Бізді іргелі істер күтуде.

Мемлекет басшысы Қасым-Жомарт Тоқаев мемлекетіміздің жа­ңа кезеңі басталғанын айтты. Бұл жол­­да еселеп еңбек ету – әрбіріміздің аза­­маттық борышымыз.

 

Жанар ТЕМІРБЕКОВА,

Қожа Ахмет Ясауи атындағы

Халықаралық қазақ-түрік университетінің ректоры

 

Түркістан облысы

Соңғы жаңалықтар

Ұқсас жаңалықтар