Таным • 17 Қаңтар, 2022

Көлеңкеден түскен көлеңке

106 рет көрсетілді

Сіз қабырғадағы сағатқа уақыттың неше болғанын білу үшін қарайтын шығарсыз, ал ол оның тықылынан өткен күндердің жаңғырығын іздейді. Уақыт артқа жылжымайды, үнемі алға ұмтылады. Оның ұлылығы сонда. Сіздің ғұмыр сағатыңыз тоқтаған сәтте ғана, ол да мәңгілік тыныстайды. Ұршықтай айналған дүние уысыңыздан сырғып бара жатқан сәтте құмсағат ғұмырыңыз құтыда өнген гүлдей солады емес пе!? Өмірдің өзіндей…

Марк Шагалдың «Сағат» атты картинасы – шебердің ең жұмбақ және көздің жауын алатын туындысының бірі. Кенепте нала мен мұң, елең-алаң сәттер, жалғандық бар, тіпті жоғалған уақыт сезімін сыйлайды.

Картинаның кеңістігін толықтай ағаш сағаттың бейнесі алып жатыр. Композицияда ағаш құрылымына тән қоңыр реңк басым. Қара және қоңыр штрихтар бөлменің ашық сары фонымен матасып, қою түстердің шеруін түзеді. Бұл түсті шешім кенепке алаңдаушылық пен бейдауа көңілдің әуенін береді.

Үздіксіз соққан сағат жүрегі ертең үмітпен оянып, тағы бір таңның әлдиін­де тербелуге жол ашады. Сенімге бағын­байтын ойлардың қақпанына түсіп қал­маңыз. Құстың шиқылына қарап, күннің қозғалысын анықтауға болады.

Шығарманың массивтілігі төменгі сол жақ бөлігіндегі жасанды кішкентай терезе арқылы ерекшеленеді. Әйнектің артындағы қара және көк таңбалар сарыға контраст болып тұр. Сәл қисық сызылған терезенің үстінде кішкентай әшекейлері бар сары перде көрінеді. Бұл бөлменің барлық элементі кеңіс­тіктен оқшау, монотонды және уақыт­тың шарасыздығын бейнелеу үшін бір түсті схемада жазылғандығын меңзеп тұрғандай. Шарасыздықтан ауыр не бар?!

Терезенің жанынан алысқа ойлы көзбен қараған адамның күңгірт көлең­кесі көрінеді. Бұл кескін үлкен алаңдау­шылыққа жетелейді. Бұл адам не ойлауы мүмкін?! Ол тұңғиыққа батқан кемедей ой иіріміне батып барады. Құдды көлеңкеден түскен көлеңке іспетті.

Уақыттың бұлжымас ағымын, артта қалған сәттерді еске түсіретін алып сағат тықылдап, жалғыз қалғанын жариялайды. Қарапайым адам қымбат сәттерді жоғалтқан бейбақ секілді бар нәрсені бойына сіңірген тұтас элементтің фонында елеусіз фигурадай көрінеді. Ал сіз не ойлайсыз?!.

Соңғы жаңалықтар

Доллар қымбаттады

Қаржы • Бүгін, 16:25

Ұқсас жаңалықтар