Спорт • 18 Қаңтар, 2022

Чемпионды күтіп алды

57 рет көрсетілді

Кеше шахматтан әлем чемпионы Бибісара Асаубаеваны жанкүйер қауым елорда әуежайынан сый-құрмет көрсетіп күтіп алды. Жаһандық жарыста жасындай жарқылдаған жер­лесіміздің жеңісіне ортақтасқан дүйім жұртшылық спортшыға ізгі тілектерін жолдады.

Жуырда Польша астанасы Варшавада шахматтан әлем чемпионаты аяқталғаны белгілі. Әлем­дік жарыстарда шашасына шаң жұқтырмауға тырысатын біз­дің Бибісара бұл жолы да жүрі­сінен жаңылған жоқ. Ол блиц бәсекесінде қарсыластарын қапыда қалдырып, әлемдік шахмат тарихында әйелдер арасында чемпион атанған ең жас шахматшы деп танылды.

Атап өтерлігі, жерлесіміз бұл бәсекеде ешкімге дес бермей, жарыстың аяқталуына бір тур қалғанда чемпион атанды. Бұл отандық спорт тарихындағы ерек­ше оқиға. Блиц жарысында екін­ші орын ресейлік Александра Костенюкке бұйырды. Ол бұ­ған дейін рапид бәсекесінде топ жар­ған болатын. Тағы бір ресейлік спортшы Валентина Гунина үшін­ші орынды қанағат тұтты.

Жалпы, Бибісара бұған дейін 8, 10, 12 және 14 жасқа дейінгі қыздар арасында классикалық шах­маттан әлем чемпионы атан­ған болатын. Сондай-ақ оның 7 және 9 жасқа дейінгі оқушылар ара­сын­дағы әлем чемпионы деген атақ­тары бар.

Варшавадағы бәсекеде Бибі­сара алтынмен ғана шектелмей, рапид бәсекесінде күміс жүлдені қанағат тұтты. 17 жасар спортшы ше­шуші сында грузиялық гроссмейстер Нана Дзагнидзені қапы­да қалдырды. Сондай-ақ жерлесі­міз Әсел Серікбайды ұтты. Дәл осы сында топ жарған ресейлік Алек­сандра Костенюкпен тең ойнады.

2021 жыл Бибісара үшін жемісті болды. Ол әлем чемпионатындағы жетістіктерінен бөлек, онлайн форматта ұйымдастырылған Азия біріншілігінде жеңіске жетті. Отандасымыз ұлттық құрамамен бірге әлемдегі үздік 8 команданың қатарына қосылды.

– Чемпионат өте тартысты өрілді. Ересектер арасындағы әлем чемпионатында алтын және күміс жүлдеге қол жеткізгенім үшін қуаныштымын. Ойналған пар­тияның бәрі оңайға түсті деп айта алмаймын. Оның үстіне ересектер арасындағы жарыс болғандық­тан қарсыластардың деңгейі өте жоға­ры. Осы орайда жаттықтырушым Сергей Долматовқа алғысымды білді­ремін. Оның жетекшілігімен до­даға тынғылықты дайындалдық. Ересектер арасында әлем чемпио­ны болу арманым еді. Сол арманым орындалды, – дейді Бибісара Асаубаева.

Еске сала кетейік, шахматтың рапид және блиц түрлерінен өте­тін әлем чемпионаты жанкүйер қауымның ерекше тағатсыздана күтетін додаларының бірі. Биыл бұл жарысқа 50 мемлекеттен 200-ден астам спортшы қатысты. Чемпионаттың жалпы жүлде қоры 1 млн АҚШ долларын құрады.

Жас күнінен жұртшылық назарында жүрген Бибісара Асаубаева әйелдер арасындағы гроссмейс­тер (2019) екенін атап өткен жөн. Сонымен қатар ол ерлер ара­сындағы халықаралық спорт ше­бері атанған (2020). Ол 2004 жы­лы 26 ақпанда Тараз қаласында дү­ние­ге келген.

Соңғы жаңалықтар

Ұқсас жаңалықтар