Суретті түсірген Ерлан ОМАР, «ЕQ»
Коронавирустың «Омикрон» штамымен ауыру көп жағдайда жеңіл және симптомсыз түрде өтеді. Таралуы басқа штамдарға қарағанда бірнеше есе жоғары. Коронавирустың жұғуы 14 күннің ішінде білінсе, «Омикрон» небәрі екі күннің ішінде адам ағзасында сыр береді. Демек тез жұғады деген сөз. Аурудың алғашқы белгілері тұмау мен жедел респираторлық аурулардағы сияқты суық тигендей көрінеді. Яғни дене қызуы көтеріліп, әлсіздік, бас ауруы, жөтел болады. Бірақ жеңіл өтеді екен деп өз бетінше емделуге болмайды. Ауру белгілері байқалған сәттен бастап дәрігерге көрініп, білікті маманның ақыл-кеңесіне құлақ асқан жөн.
Денсаулық сақтау министрі Ажар Ғиният дүние жүзін дүрбелеңге салған короновирустың «Омикрон» түрі еліміздің эпидемиялық жағдайын ушықтырғанын атап өтті.
«Елімізде COVID-19-бен тәуліктік сырқаттанушылықтың 60%-дан астамы үш аймақта тіркеліп отыр. Нұр-Сұлтан қаласында ауру 32 есе өсіп, бұл ретте тестілеу деңгейі ел бойынша ең жоғары және тәулігіне 10 мыңнан аса тесті құрап отыр. Бірақ халықты вакциналау қарқыны 1,5 есе және ревакциналау қарқыны 4 есе төмен. Алматы қаласында SARS-CoV2 ауруы 8 есе өсті, тестілеу деңгейі қалпына келтіріліп, осы жылғы қаңтардан бастап 3,5 есеге артты. Вакциналау қарқыны 1,6 есе және ревакциналау қарқыны 3 есе төмендеп отыр. Қарағанды облысында сырқаттанушылық 9 есе өсті, ал вакциналау қарқыны 3 есе және ревакциналау қарқыны 3,5 есе төмендеді. Бүгінде елімізде барлығы 21 мың инфекциялық төсектік орын ашылды, оның 33%-ы аурулармен қамтылған, реанимациялық орын 2 мыңнан астам, оның 16%-ы қамтылған. Резервте 30 мың инфекциялық және 3 мың реанимациялық орын бар», деді А.Ғиният.
Оның айтуынша, республика бойынша ревакциналауға жататын халықты қамту 26,8%-ды құрап отыр. 800 мыңнан аса адам егілді. Үш өңірде – Атырау, Түркістан облыстарында және Нұр-Сұлтан қаласында қамтылу деңгейі ең төмен: 13%-дан 17,0%-ға дейін. Барлық өңірде вакциналау мен ревакциналау қарқынын арттыру қажет. Бұл – ауруханаға түсудің, коронавирус инфекциясынан болатын ауыр ауру ағымы мен өлімнің алдын алудың жалғыз тәсілі.
Нұр-Сұлтандағы №15 қалалық емхананың дәрігері Гюзель Егінбай ревакциналау алғашқы жасалған екпеден кейінгі иммунитетті күшейтетінін айтты.
«Ревакциналау – вакцинаны немесе оның компоненттерінің бірін қайта енгізу. Бұл шара алдыңғы вакциналардан кейінгі иммунитетті қолдауға бағытталған. Жалпы, ревакциналау иммунитеттің вируспен күресуі үшін жасалады. Уақыт өте келе ағзаның коронавирус инфекциясынан қорғалу дәрежесі төмендейді, осыған байланысты вакцинаны қайта алу қажет. Қазақстанда ревакциналау шартты түрде екі кезең бойынша өтетіні белгілі. Бірінші кезекте қауіп тобындағы адамдар егіледі. Алдымен медицина қызметкерлері, педагогтер, күш құрылымдары мен жабық балалар мекемелерінің қызметкерлері ревакциналаудан өтеді. Сондай-ақ ревакциналау негізінен созылмалы инфекциямен ауырған немесе өткір инфекция жұқтырған адамдар үшін қажет. Мұндай адамдарда иммунитеттің әлсіреуі жиі кездеседі және коронавирусқа қарсы иммундық күшті сақтау үшін пациенттерге ревакциналау қажет. Айта кету керек, ревакциналау инфекцияны қайта жұқтыру қаупін күрт төмендетеді. Ревакциналау тәртібі екпені алғаш алған кездегідей жүргізіледі», деді Г.Егінбай.
Денсаулық сақтау министрлігінің кешегі күнгі мәліметі бойынша 110 731 адам коронавирус инфекциясынан емделуде, олардың ішінде 8 344 пациент стационарда, 102 387 науқас амбулаторлық деңгейде ем қабылдауда. КВИ-ге шалдыққандардың арасында 299 адамның жағдайы ауыр, 88 пациенттің жағдайы өте ауыр, 49 науқас ӨЖТ аппаратында жатыр.
Айта кететін жайт, елімізде коронавирус жұқтырғандардың оқшаулану мерзімі қысқарады. Бас санитар дәрігердің тиісті қаулысы әзірленіп жатыр. Енді ковидпен ауырғандар тек 10 күнге карантинге жабылады. ПТР-тестің қорытындысы бойынша Ashyq-тағы мәртебе бір аптада ауысады. Жаңа қаулы қабылданғанға дейін карантин тәртібі 14 күн болады.
