Дулат Қажмұханбет пен Айдос Қисаменов аталған партияның әрекетсіздігінен көңілі қалғанын айтып, әлеуметтік желіге жазба қалдырған. Артынша тағы 150 азамат Nur Otan партиясынан шығуға өтініш жазған.
Семейде Nur Otan партиясының депутаттары Дулат Қажмұханбет пен Айдос Қисаменов өз еркімен өкілеттіктерін тоқтатты. Өкілдік органнан кету туралы шешім қабылдауға не түрткі болды десек, экс-депутаттар партия басшылығынан қолдау таба алмағандарын айтады.
Nur Otan партиясының ШҚО бойынша филиалы төрағасының бірінші орынбасары Олег Чугунков партиядан шығып кеткен Семейдегі қалалық мәслихаттың екі депутатына қатысты пікір білдірді.
Оның айтуынша, экс екі депутат өз мекемелеріндегі қызметкерлерді де партиядан шығарып алуды көздеп отыр. Шығып кеткен 150 адамның орнына дәл қазір Nur Otan партиясы қатарына 200 адам өз еркімен кіруге дайын екен.
– Бұл депутаттардың партиялық мансабы кезінде ешқашан өзінің азаматтық ұстанымын білдірмегенін, партияның бірде-бір әлеуметтік маңызды жобасына қатыспағанын, керісінше тек күн сайын өздерінің селқостығын көрсеткенін атап өткім келеді. Саяси партия – бұл ортақ саяси мақсаттар мен ұстанымдар негізінде құрылған азаматтардың ерікті бірлестігі екенін еске саламын. Осылайша, екі азамат өздерінің ажырамас конституциялық құқықтарын екі рет пайдаланды: бірінші рет партияға кіргенде, екіншісі одан шыққан кезде. Оларға айтарымыз, жолдары ашық болсын! Біз ешкімді күшпен ұстамаймыз, – дейді Олег Васильевич.
Келесі айдан бастап Nur Otan жария форматта партия атынан депутаттардың қоғамдық рейтингін қалыптастыру үшін онлайн платформаны іске қоспақ. Бұл рейтинг мәслихаттар депутаттарын халықпен неғұрлым тиімді және тұрақты өзара іс-қимыл жасауға ынталандыру және сайлау алдындағы бағдарламаларды іске асыру үшін олардың дербес жауапкершілігін арттыру мақсатында құрылады.
– Nur Otan бәсекелестік күрес арқылы көшбасшы партия болып табылатынын дәлелдеді. Біздің алдымызда көп жұмыс пен міндеттер тұр. Мұндай азаматтардың шешіміне алаңдауға уақыт жоқ. Мемлекет басшысы жариялаған реформаларды сапалы жүзеге асыру үшін партиямыз тек нығая түсетініне сенімдімін, – дейді ол.
Сондай-ақ Олег Чугунковтың айтуынша, «партия қатарында болғанды ұнататын, бірақ өзін оның бір бөлігі сезінбейтін» тұлғалардан жүйелі түрде тазарту жұмыстары жыл сайын жүргізіледі.
