Польша шекара күзетінің хабарлауынша, екі ел арасындағы 5 метрлік бөгеттің құрылысына арналған алаңдар тапсырма орындаушыларға берілді. Жұмыстар бір мезгілде төрт учаскеде жүргізіледі.
Польша-Беларусь шекарасының жалпы ұзындығы – 418 км. Шекараның көп бөлігі Буг өзені арқылы өтеді.
Польша үкіметі бұл жобаның құны 1,6 млрд злоты, яғни 340 млн еуроны құрайтынын хабарлады. Құрылысқа қаражат ел бюджетінен бөлінеді. 186 шақырымдық тосқауыл маусым айында дайын болуы керек.
«Қазіргі уақытта шағын-шағын топ болып Польша-Беларусь шекарасын заңсыз кесіп өтуге тырысатындар көп. Әдетте 30 адамға дейін жиналып, рұқсатсыз өтеді. Өткен жылдың қазан айында мұндай топтардың саны артып, бірнеше мыңға жетті», дейді Польша Шекара күзетінің ресми өкілі Кристина Якимик-Ярош.
Болашақта қабырғаны заманауи бақылау құралдарымен жабдықтау жоспарлануда.
Беларусь пен Латвия, Литва және Польша шекарасындағы жағдай 2021 жылғы 8 қарашада күрт нашарлады. Бірнеше мың адам Беларусь жағынан Польша шекарасына келді, кейбіреулері тікенді сымнан жасалған қоршауды бұзып, Польша аумағына өтуге тырысты.
Өткен жылы Беларусьтан Польшаға 40 мыңға жуық заңсыз кірген мигрант тіркелді. Бір жыл бұрын олардың саны тек 122 болатын. Заңсыз өтушілер саны артқаннан кейін Польша үкіметі тосқауыл-қабырға салу шешімін қабылдады.
