Мемлекет басшысына елордағы әлеуметтік нысандардың құрылысы, газбен қамту ісі, үлескерлік құрылыс нысандарының аяқталуы мен инвестиция тарту мәселелері жөнінде жан-жақты ақпарат берілді.
Президент әлеуметтік нысандар құрылысының көлемін ұлғайту, тозығы жеткен ескі тұрғын үйлерді сүру және жаңа тұрғын үй алаптарын дамыту қажеттілігіне ерекше назар аударды. Жұмыс орындарын ашу және жастарды қолдау мәселесі басым міндеттердің бірі ретінде атап өтілді.
Қабылдау барысында биыл 10 мың әлеуметтік пәтер салынатыны айтылды. Айта кетсек, соңғы үш жылда бұл көрсеткіш 3 есе артқан. Биыл тағы да 40 көппәтерлі тұрғын үй кешенінің құрылысы аяқталып, кемінде 16 мектеп салынатын болады.
Сондай-ақ, Қасым-Жомарт Тоқаевқа қаладағы эпидемиологиялық ахуалды тұрақтандыруға және вакциналауға бағытталған шаралар туралы баяндалды.
Кездесу соңында Президент елорданы одан әрі дамыту мақсатында бірқатар тапсырма жүктеді.
