Ослоның «Теннис Аренасында» өтетін бәсекеде жерлестеріміздің қандай құрамда өнер көрсететіні анықталды. Жекелеген сайыста Александр Бублик, Михаил Кукушкин және Дмитрий Попко кортқа шығады. Қазіргі кезде Бублик әлемдік рейтингте 35-орынды иеленуде. Соңғы уақытта ол өрелі өнерімен көзге түсіп, елеулі табыстарға қол жеткізуде. Кукушкин 166-орынды еншілесе, Попко 180-сатыға жайғасты. Жұптық бәсекеде Андрей Голубев пен Александр Недовесовке сенім артылуда. Көпшілік бұл кездесудің қазақстандықтардың пайдасына шешілетініне еш күмәні жоқ. Себебі Скандинавия түбегі теннисшілері арасында тек Каспер Руудты ғана бөле-жара атап өтуге болады. АТР турнирлерін алты рет ұтып, былтыр Аустралияның ашық біріншілігінің ширек финалына дейін жеткен сайыпқыран бұл күндері әлемнің сегізінші ракеткасы атанып отыр. Ал өзгелері, тіптен «ТОП-300» ойыншының қатарында жоқ. Осы матчта жеңіске жеткен команда Дэвис кубогының финалдық сайысына жолдама алады.
