«Сені сүю – әлемге маңдайдан нұр тарату», дейді белгілі ақын Тыныштықбек Әбдікәкім. Шынымен асқақ сезімнің аясында күннің өзі көлеңкелейтіндей, тіпті ғашық жан алапат өртті бір тамшы сумен өшіруге қауқарлы. Теңіздің арғы бетіне қайықсыз құлаш сермегендей жаныңызды жасампаз жігер билейді. Сол әсердің әуеніне еліткен атыраулық жас суретші Рафаэль Слекенов «Алғашқы сүю» картинасын жазады. Бұл оның қырмызы гүлге толы мың бояулы әлемі.
Қылқалам шебері өз картиналарын жапондық мультиинструменталист Китароның медитациялық музыкасына бойлай отырып жазып, идеяларын жетілдіреді екен. Содан да болар оның ойлау кеңістігі өзгеше. Мәселен, ол өз стилін «джаз кескіндеме» немесе «авангард» деп атайды. Бұдан қазақ бейнелеу өнеріндегі жас буын өкілдерінің картина жазудағы еркіндігі, қылқалам ұстаудағы шеберлігі, әрқайсысының өзіндік пікірі қалыптасып келе жатқанын байқауға болады. Әсіресе тақырып таңдаудағы жетістігі орасан.
Жас суреткер бұрынғы кеңестік кезеңнің канондарынан бас тартып, заманға сай тәуелсіз тақырыптарға барып, жаңа бағытқа бет бұрды. Бұл үрдіс қазақ өнерінің рухани ерекшелігін жоғалтпай, қайта өнердің қайталанбас пластикалық тілін қалыптастырды. Сенбесеңіз, автордың шығармашылығына үңілсеңіз болады. Біз мысалға алған туындыда шығыс сурет өнеріне тән детальдар кездеседі.
Гүлзар бақ ішінде бұрала билеген қос ғашықтың айналасы толған раушан гүлі. Ақ пен қызыл түстердің өзара байланысы, көк түспен шекараласып шығарманың интерьерін байытып тұр. Бұл бояулар жастық шақтың асаулығын, тазалығын сипаттайды. Бозбала мен бойжеткеннің мөлт еткен махаббатынан жаралған композиция көңіл елітіп қана қоймай, жүрекке жылу ұялатады.
