Фристайлшы Юлия Галышеваның жарыс жолына шығуын барша қазақстандық жанкүйердің тағатсыздана күткені жасырын емес. Себебі ол біздің осы додадағы басты үмітіміз еді. 29 жастағы Шығыс Қазақстан облысы тумасының бұған дейін де бағындырған белестері бір төбе. Оның әлем чемпионы, әлем чемпионатының бірнеше дүркін жүлдегері, Азия ойындарының үш дүркін жеңімпазы, Дүниежүзілік Универсиаданың екі дүркін жеңімпазы және басқа да толып жатқан атақтары бар. 2018 жылы Оңтүстік Кореяның Пхенчхан қаласында алауы тұтанған Олимпия ойындарында Қазақстан құрама командасының қоржынына жалғыз медальды салған да дәл осы спортшы.
Бейжіңдегі жарыстың бастапқы сатыларында тәуір өнер көрсеткен Галышева «ТОП-12» фристайлшының қатарынан көрініп, өз көрермендерін бір желпіндіріп тастаған еді. Бірақ одан әріге Юлияның шамасы жетпеді. Екінші финалда небәрі 49.74 ұпай жиған ол үздік алтылықтың санатына қосыла алмады. Нәтижесінде, жүлделі орындар үшін таласу мүмкіндігінен айырылып, Бейжің Олимпиадасын 11-орынмен қорытындылады.
Фристайл-могулдан өткен жарыста 23 жастағы Аустралияның аруы Джакара Энтони алтыннан алқа тақты. Дәл осы спортшының Пхенчхандағы ойындарда жеңіс тұғырына сынық сүйем жетпей сүрініп, төртінші орынға тұрақтағаны есімізде. Бұл жолы Джакараның жұлдызы жарқырады. Америкалық Джелин Кауф күміс алса, ресейлік Анастасия Смирнова қола медальды мойнына ілді.
Шаңғышылардың скиатлон түрі бойынша ресейлік Александр Большунов алдына жан салмады. Брянскінің тумасы осыдан төрт жыл бұрын Пхенчханда қанша талпынғанымен, бас жүлдеге қол жеткізе алмаған еді. Сары құрлықта өткен Олимпиаданы ол 3 күміс және 1 қоламен қорытындылады. Бұл жолы 25 жастағы Большуновтың бағы жанып, алтын тұғырдан қол бұлғады. Александрдың командалық әріптесі, үш дүркін Олимпия ойындарының жүлдегері Денис Спицов күміспен күптелсе, Сочи мен Пхенчхан Олимпиадаларының жеңімпазы, әлем чемпионы, финляндиялық Ийво Нисканен қола медальды қанағат тұтты. Қазақстандық Виталий Пухкало 32-орында қалып қойса, Евгений Величко жарыс жолынан шығып қалды.
Конькишілердің сайысында Нидерландтың жігіттері жасындай жарқылдады. Әлемнің екі дүркін чемпионы Нильс ван дер Пул бас жүлдені олжаласа, Патрик Руст екінші орынға табан тіреді. Үшінші сатыға норвегиялық Халльгейр Энгебротен жайғасты. Сноубордта Жаңа Зеландияның өкілі Халльгейр Энгебротен жеңіске жетсе, америкалық Джулия Марино мен аустралиялық Тесс Коуди жүлдегерлер қатарынан көрінді.
Шаңғымен трамплиннен секіруде Жапонияның жұлдызы Рею Кобаясидің алдына ешкім түсе алмады. Аустриялық Мануэль Феттнер екінші және польшалық Давид Кубацки үшінші орындарды еншіледі. Қазақстандық Сергей Ткаченко мен Данил Васильев сын сағатта білгендерінен жаңылып, көш соңында қалып қойды. Шана спортында германиялық Йоханнес Людвигке тең келер ешкім табылмаса, одан кейінгі орындарға аустриялық Вольфганг Киндл мен италиялық Доминик Фишналлер тұрақтады.
Кеше мәнерлеп сырғанаудан командалық жарыс өз мәресіне жетіп, Ресей құрамасы бас жүлдені жеңіп алды. Бұл команда сапында Марк Кондратюк (ерлердің жекелеген сайысы), Анастасия Мишина мен Александр Галлямов (жұптық сайыс), Виктория Синицина мен Никита Кацалапов (мұздағы би), Камила Валиева (әйелдердің жекелеген сайысы) сынды саңлақтар өнер көрсетті. Күміс медаль АҚШ-қа бұйырса, Жапония қола жүлдені иемденді.
Бейжің Олимпиадасында әзірге 18 елдің өрендеріне жүлде алу бақыты бұйырды. Көш басында – Ресей спортшылары. Олар түрлі-түсті медальдардың әрқайсынан екі-екіден иеленіп отыр. Екінші және үшінші орындарды Норвегия мен Швеция өзара бөлісуде. Скандинавия түбегінде орналасқан қос мемлекет өкілдері екі алтыннан олжалады. Оған қоса норвегиялықтардың тағы бір қоласы бар. Төртінші және бесінші сатыларға Германия мен Нидерланд жайғасты. Бұл елдердің спортшылары 1 алтын мен 1 күмістен еншілеуде. Алтыншы орында – Жапония. Күншығыс елінің өрендері 1 алтын мен 2 қоланы олжалады. Жетінші және сегізінші орындар Аустралия мен Словенияға тиесілі. Олардың қоржынында 1 алтын мен 1 қола медаль бар. Үздік ондықты бас жүлдені бір-бірден иеленген Қытай мен Жаңа Зеландияның өкілдері түйіндеп тұр.
