Коллажды жасаған Амангелді Қияс, «ЕQ»
2021 жылдың соңғы алты айында АІХ-тегі сауда-саттықтың жалпы көлемі 210 507 470 долларды құрап, 2020 жылғы 6 айдың көрсеткішіне қарағанда 6,3 есе өсім көрсетті. Жылдың аяғына қарай биржадағы сауда-саттықтың белсенділігі төмендеді. 2021 жылғы желтоқсанда биржадағы сауда-саттықтың көлемі 13 922 599 долларды құрап, қарашамен салыстырғанда 2,2 есе төмендеген.
2021 жылғы желтоқсанның соңындағы жағдай бойынша АІХ-тің ресми тізіміне әртүрлі 89 эмитенттің 136 бағалы қағаздар шығарылымы енген. Оның ішінде 2 ETF (Exchange traded funds) пен 17 ETN (Exchange traded notes) бар. 18 қазақстандық және 11 халықаралық брокер АІХ-тің сауда мүшелері болып саналады. АІХ Орталық депозитарийінде инвесторлардың 160 мыңнан аса шоты ашылған.
АІХ бөлшек сауда инвесторлары қорын белсенді дамытуда. 2021 жылы олардың жалпы саны 1,5 есе артып, 159 248 шот межесіне жетті. Қазақстан халқының арасында инвестициялау мәдениетін дамытуға АІХ 2020 жылы іске қосқан Tabys қосымшасы ықпал етуде. Қосымша жұмыс істей бастаған сәттен бастап онда 16,7 мың бөлшек сауда инвесторы тіркелген.
Желтоқсан айында АІХ-те бірқатар жаңа листинг өтті – 7 эмитент облигациясын шығарды, 3 компания Pre-IPO секторына кірді, 1 ETN шығарылымы өтті. іX Bitcoin Exchange Traded Notes биржалық нотасын шығару айтулы оқиға болды. Оның базалық активтері биткойнға фьючерстердің динамикасын қадағалап отыратын ең ірі қорлардың бірі – ProShares Bitcoin Strategy ETF (BITO) акциялары болғанын атап өту керек.
Еуразия даму банкі АІХ-те жылдық 1,5 пайыздық мөлшерлемемен 100 млн доллар көлемінде екі жылдық облигациялар орналастырды. «Фридом Финанс Кредит» микроқаржы ұйымы АІХ-те 100 млн долларлық облигациялар және 30 млрд теңге сомасына ұлттық валютада борыштық құралдардың 2 орналастырылымын жүзеге асырды. АІХ-те BI Group құрылыс холдингінің еншілес ұйымдарының борыштық құралдарын шығару бойынша жұмыс жалғасуда. Желтоқсанда «Мидвест» және «Кең дала» компанияларының облигациялары орналастырылды. Сонымен қатар жылдың соңғы айында АІХ-тің ресми тізіміне Tas Finance Group микроқаржы ұйымының және Bolashaq Investments компаниясының бондтары кірді.
Желтоқсан айында 3 компания АІХ-ті болашақта өз акцияларын орналастыратын негізгі алаң ретінде таңдады. Pre-IPO секторына «Каспий мұнай» АҚ мұнай-газ компаниясы, сонымен қатар Eurasian Resources Group компаниясының екі еншілес ұйымы – «Қазақстан электролиз зауыты» АҚ және «Қазақстан алюминийі» АҚ кірді.
Желтоқсан айының соңында АІХ-те үлестік құралдар листингі бар компаниялардың («Қазатомөнеркәсіп», «Халық Банк», Ferro-Alloy Resources Limited, «Банк ЦентрКредит», Kaspi.kz, Kcell) жалпы нарықтық капиталдандырылуы 45,8 млрд доллардан асты.
COVID-19 штамдарының таралуы мен жоғары инфляция салдарынан 2021 жылдың екінші жартыжылдығында қор нарықтарының құбылмалылығы жоғары болды. Соған қарамастан 2021 жылғы 1 шілдеден бастап AIXQI индексі 1104,04 пунктке дейін 10,4 пайызға өсті. Ең үлкен мән – 1204,58 пункт, 11 қарашада тіркелді.
Жартыжылдықтың қорытындысы бойынша, AIXQI индексіне кіретін 8 компанияның 6-ы оң динамика көрсетті. Индекс компанияларының арасында өсу бойынша «Банк ЦентрКредит» көш бастады, оның акцияларының өсімі жарты жыл ішінде 59,84 пайызды құрады.
Естеріңізде болса, «Банк ЦентрКредит» акциялары 2018 жылдан бері теріс динамика көрсетіп келді. Алайда қызметтің күшті қаржылық нәтижелері, кредиттік портфельді жақсарту, S&P және Moody’s әлемдік рейтинг агенттіктерінің бағалауларының жақсаруы есебінен 2021 жылы банк бұл үрдісті өзгерте алды.
Инвесторлардың жаһандық энергетикалық көшу аясында ядролық энергетикаға қызығушылығы артуы есебінен уран бағаларының раллиі қарқынының бірінші жартыжылдықта басталған төмендеуіне қарамастан, 2021 жылдың 6 айы ішінде «Қазатомөнеркәсіптің» баға белгілеулері 28,77 пайызға өсті.
Көш бастаған үштіктің соңғысы қаржы секторының тағы бір өкілі – Kaspi жартыжылдықты 16,91 пайыздық өсіммен аяқтады. Өз кезегінде «Халық банк» жартыжылдықты 7,66 пайыздық өсіммен түйіндеді.
«Қазақтелеком» үшін де өткен жыл ойдағыдай өтті. Қаржылық оң нәтижелер мен Telia Company A.B. компаниясына қарсы сотты «Қазақтелеком» пайдасына 22 млн доллар мөлшерінде өтемақы төлеумен ұтуы аясында Қазақстанның телекоммуникация секторы көшбасшысының баға белгілеулерінің өсуі 2021 жылғы 6 ай ішінде 15,85 пайызды құрады.
AIXQI-ке кіретін металлургия секторының өкілдері жартыжылдықты бірде-бір динамикасыз жапты – Central Asia Metal акциялары 8,46 пайызға өсті, ал Polymetal акциялары 16 пайызға төмендеді. KazTransOil акциялары жартыжылдықты 0,54 пайызға шамалы төмендеумен аяқтады.
Желтоқсан айында AIXQI индексінің мәні 1138,21 пункттен 1104,04 пунктке дейін 3 пайызға төмендеді, индекстегі 8 компанияның 5-і айды теріс мәнде аяқтады. Өсу бойынша «Банк ЦентрКредит» көшбасшы болды, оның баға белгілеулері 12,74 пайызға артты. Одан кейінгі орында 12 пайыздық өсіммен Central Asia Metals акциялары тұр. Компания қаржылық, сол сияқты операциялық жақсы көрсеткіштерге ие. Әсіресе Қазақстан аумағында мыс өндіру бойынша 2021 жылға арналған 13 855 тонна жоспары 14 041 тоннаға дейін асыра орындады.
Қор нарықтарындағы жылдың соңына қарай қалыптасқан белгісіздік AIXQI индексіндегі бірқатар компанияның баға белгілеулерінің аздаған өзгерістеріне алып келді. «Халық банк» акцияларының бағасы оң мәнге өзгерді (+1,88 пайыз), «Қазақтелеком» (-0,28пайыз), Polymetal (-3,03пайыз) және KazTransOil (-3,18пайыз) акциялары аздап төмендеді. 2021 жылы жақсы динамика көрсетіп, өсу бойынша көш бастаған Kaspi және «Қазатомөнеркәсіп» акциялары желтоқсан айында тиісінше 10,61 пайызға және 10,57 пайызға түзелді.