Елорда • 10 Ақпан, 2022

Нұр-Сұлтанда үй карантинін бұзғандар саны көбейді

Нұр-Сұлтанда эпидемиологиялық ахуал тұрақталып келеді. Өткен аптамен салыстырғанда қалада аурушаңдық 2,8 есеге төмендеді. Бұл туралы қаланың бас мемлекеттік санитар дәрігері Сархат Бейсенова мәлімдеді, деп хабарлайды Egemen.kz.

Гауһар ҚАПАШ

«Өткен аптамен салыстырғанда аурушаңдық 2,8 есеге, яғни 100 мың тұрғынға шаққанда 749,0-ден 260,6-ға дейін төмендеді. Соған қарамастан қала коронавирустың «қызыл»аймағында тұр», деді Бейсенова.

Алайда қалада үй карантинін бұзғандар саны көбейген.

«Жыл басынан бері Ashyq жүйесіне тіркелген нысандарға келушілер арасында 60 400-ден астам адамның үй карантинін бұзғаны анықталды. Оның ішінде 6 300-ден астам адамның жүйеде «қызыл» статусы болған, яғни коронавируспен ауырып жүрген адамдар», деді Бейсенова.

Биылғы жылы 6 мыңға жуық оқушыдан коронавирус табылды.

«Жыл басынан бері 5 929 бала коронавирус жұқтырды, оның ішінде 365 бала офлайн форматта білім алған. 3 345 оқушы онлайн форматта оқыған, 2 219 бала демалыс кезінде инфекция жұқтырған», деді ол.

Айта кетері, елордада өткен тәулікте 305 адамнан коронавирус анықталған. Ал жыл басталғалы 83 917 адамнан Covid-19 табылды. Оның ішінде 79 127 жағдай қаңтарда тіркелді. Сархат Бейсенова мұны коронавирус жұқтыру бойынша рекордтық айлық көрсеткіш деп атады.

«Жыл басында науқастардың көп болуына байланысты науқастардан алынған 51 оң сынамаға секвенирлеу жүргізілді, нәтижесінде «омикрон» штамы коронавируспен ауыратын 70,6-дан астам астаналықта анықталды. Ал қалған 29,4%-інен «дельта» штамы табылды. Елордада омикрон штамы басым болып тұр», деді қаланың бас санитар дәрігері.

Күннің маңызды және өзекті жаңалықтарын «Егемен Қазақстан» телеграм каналынан оқыңыз