Алматы қалалық сотының мәліметінше, белгілі вайнерлер Қылмыстық кодекстің 217-бабы «Қаржылық (инвестициялық) пирамиданы құру және оған басшылық ету» бойынша айыпталған. Нақтылап айтқанда, осы баптың 3-бөлігінің 2-тармағына сәйкес қылмыстық іске күдікті ретінде ұсталған. Ал бұл заң нормасында «аса ірі мөлшерде ақша немесе өзге мүлікті тарта отырып» қылмыс жасау туралы айтылады. Егер 3-тармақта көзделген жағдайлар өз дәлелін тапса, әлеуметтік желі «жұлдыздарының» бар дүние-мүлкі тәркіленіп, өздері жеті жылға дейін бас бостандықтарынан айырылулары әбден мүмкін. Бір айта кетерлігі, кодексте «Қаржылық пирамиданы құруға дем берушілік немесе оған немесе оның құрылымдық бөлімшесіне басшылық ету туралы өз еркімен мәлімдеген, сондай-ақ оның қызметін ашуға немесе жолын кесуге белсенді түрде ықпал еткен, қаржылық пирамиданы ұйымдастырушыдан басқа адам, егер оның әрекеттерінде өзге қылмыс құрамы болмаса, қылмыстық жауаптылықтан босатылатындығы» жөнінде де ескертіледі.
Алматының тергеу соты үш күдіктіге қатысты бұлтартпау шарасын санкциялаған. Қазіргі таңда М.Төребаев пен М.Шерниязов 1000 айлық есептік көрсеткіш, яғни 3 063 000 теңге кепілмен босатылса, А.Саидбаевты полицияның әлі таба алмағаны ғана белгілі. Алайда соңғысы сот санкциясымен сырттай екі ай мерзімге қамауға алынды. Тергеу мәліметтеріне қарағанда, вайнерлер Mudarabah Capital компаниясының жарнамасын жасаған және оны басқарады деген күдікке ілініп отыр. Естеріңізде болса, өткен жылдың қазан айынан бастап осы компанияның бірнеше лауазымды адамы, соның ішінде бас директор Руслан Бұрқанов қамауға алынған болатын. Тергеу компания мемлекеттік сатып алуға қатысу үшін қаржы пирамидасының қағидаты бойынша азаматтар мен фирмалардың қаражатын тартып отырған деп санайды.
2019 жылдың ақпан айынан бастап 2021 жылдың қаңтарына дейін Mudarabah Capital пен Astex компанияларының басшылары заңды және жеке тұлғалармен мемлекеттік сатып алуға қатысу үшін қажетті қаржы тартуға қатысты шарттар жасасқан. Бұл құжат бойынша фирмалар ай сайын әр салымшыға салым сомасының 20 пайызын төлеп отыруға тиіс болған. Осы уақыт аралығында 160-тан астам салымшы Mudarabah capital арқылы Astex-ке
2 млрд теңгеден астам қаржы құйған. Ал компаниялардың жарнамасын елге танымал вайнерлер мен актерлер, соның ішінде Мейіржан Төребаев пен Мейірхан Шерниязов жасаған болатын. Жарнамада «жұлдыздар» компания тендерлердегі ақшаны «айналдыру» арқылы ай сайын жоғары пайызда қаржы табуды көздейтінін айтып, көпшілікті қызықтырған еді. Вайнерлердің жарнамасына сеніп, қомақты ақшаларынан айырылып қалғанын кеш түсінген салымшылар ақыр соңы арыздарын арқалап полицияға жүгінген.
ІІМ Тергеу департаментінің басшысы Санжар Әділовтің хабарлауынша, бүгінде елімізде қаржы пирамидалары құрбандарының саны 30 мыңнан асып кеткен. Осыншама халық 54 млрд теңгеден астам қаржысынан айырылып қалған. Бір ғана Мейіржан Төребаевтың Instagram парақшасына 4 миллионға жуық адамның жазылғанын ескерсек, әдетте тез баю мен оңай олжаға кенелуді жарнамалайтын «жұлдыздардың» әлі қанша жанды жарға жығарын шамалай беруге болады.
