Оралда бекіре тұқымдас балық өндіру кешенінің базасында зауыт құрылысы басталады. Бұл туралы мәлімдеген Қоршаған ортаны қорғау және су ресурстары министрі Нұрлан Қаппаров мұның еліміздегі балық шаруашылығын жаңаша бағытта дамытуды мақсат еткен алғашқы инновациялық жоба екенін атап өтті.
Оңтүстік Қазақстан облысының әкімдігі Майра Мұхамедқызына автокөлік сыйлады. Белгілі опера әншісін Ұлыстың ұлы күні қарсаңында қабылдаған аймақ басшысы Асқар Мырзахметов оның әлемдік деңгейде өнер көрсетіп, елдің абыройын асқақтатып жүргеніне ризашылық білдірді. Ал бүгін Қазақстанның еңбек сіңірген әртісі Шымкенттегі Ж.Шанин атындағы облыстық драма театрда мерекелік концерт береді.
Петропавл қаласының тұрғыны 114-ке толған туған күнін жақын-жұрағаттарымен тойлады. Қазақстанда ең ұзақ өмір сүруші екінші адам болып табылатын Бикамал Мұржықова әжей бүгінде 12 немере мен 25 шөбереден бөлек, шөпшек те сүйіп отыр.
Павлодарда Наурыз мерекесі қарсаңында 115 тұрғынға жаңа пәтерлердің кілттері тапсырылды. «Жұмыспен қамту-2020» мемлекеттік бағдарламасының аясында салынған 9 қабатты үйдің ендігі иелері арасында жұмыссыздар, мүгедектер мен облыс орталығының еңбек нарығындағы қажет мамандықтарға арнайы курстарда оқып жатқан жас отбасылары бар.
Қызылорда облысының прокурорлары заңсыз берілген 1,9 млн. теңгенің жалақысын бюджетке қайтарды. Облыстың Сырдария аудандық прокуратурасы аудандық ішкі істер бөлімінің бюджет қаржысын игеруін тексеру барысында лажсыз бос жүрген уақыты үшін 2 қызметкерге заңсыз төленген ақшаның кері қайтарылуына қол жеткізді.
Тараз кардиохирургиялық емханасы жүрекке ота жасаудың жаңа түрін меңгерді. Бұдан бірер күн бұрын «Жүрек» атты орталықта қан шығармау тәсілімен жүргізілген «радиожиілік аблациясы» аталатын бұл операцияны жас дәрігер Тимур Әшіров Еуропадан келген Роин Реквавамен және Ярослав Стрехарскимен бірге жасады.
24KZ, BNews.kz, Nur.kz, Egemen.kz
хабарлары бойынша дайындалды.
