Вашингтон штатында көшкіннен 18 адам жоқ болып кетті

Наурыздың 23-і күні Американың Вашингтон штатында орын алған топырақ көшкіннен 18 адам жоқ болып, хабарсыз кетті. Бұл туралы ИТАР-ТАСС хабарлады. KTLE телеарнасының мәліметінше, осы топалаң тұсында тағы 3 адам қаза тауып, 8 адам жарақаттарымен ауруханаға түскен. Вашингтон билігі 3 адамның қаза тауып, 8 адамның ауруханаға жеткізілгенін растады. Селдетіп жауған жауынның салдарынан орын алған топырақ көшкіні нәтижесінде Даррингтон қаласына баратын тас жол жабылып қалған. Сазды балшық пен құлаған ағаштардың алып жатқан аумағы 1,6 шақырымға дейін барады. Кей жерлердің тереңдігі 10 метрге дейін жетеді. Тас жолдың бойындағы 28 тұрғын үй қирауға ұшыраған. Штат билігі енді қаупі төніп жатқан су тасқынына байланысты тұрғындарды шұғыл басқа жақтарға көшіре бастады. Көшкіннен аман қалған адамдарды жоғарыдан тікұшақпен іздестіру жалғасып жатыр. Мұрат Айтқожа. Дереккөз:ИТАР-ТАСС. Фото: ИТАР-ТАСС: