Мәскеуде «Жыл ақыны» және «Жыл жазушысы» анықталды

Ресей астанасы – Мәскеу қаласында 2013 жылдың «Жыл ақыны» және «Жыл жазушысы» ұлттық әдеби сыйлықтарының иегерлері анықталды. Бұл туралы ИТАР-ТАСС хабарлады. Осыған арналған салтанат Орталық әдебиетшілер үйінде өтті. «Сыйлықтың міндеті – қазіргі заманғы орыс әдебиетін дамытуға айтарлықтай үлес қоса алатын жаңа талантты авторларды іздестіру, сондай-ақ олардың шығармашылығына оқырмандардың кең ауқымын тарту, - деп түсіндірді конкурсты ұйымдастырушылар. – Сайысқа Ресей мен басқа да елдердің жастары 16-ға толған азаматтары қатыса алады». Конкурсқа қатысуға талап білдірушілер шығармаларын 700 мыңнан астам әдебиетшінің басын біріктіріп отырған «Стихи.Ру» және «Проза.Ру» порталдарына жөнелтеді. Ұйымдастыру комитетінің төрағасы, «Стихи.Ру» және «Проза.Ру» порталдарының бас директоры Дмитрий Кравчук ИТАР-ТАСС тілшісіне екі сыйлық әдеби кеңістікті қалыптастыруға ықпал ететінін айтты. «Біз сыйлық айналымының өсіп келе жатқанына қуаныштымыз. Үлкен қазылар алқасы биыл көптеген күшті авторларды атап өтті, - деді ол. – Екі категория бойынша аталым алған авторлар саны бір жарым есеге өсті». Биылғы маусымда «Жыл жазушысының» финалына 75 жазушы шықса, «Жыл ақынының» ақтық сынына 150 ақын іріктеліп алынды. Нәтижесінде жазушы Виорэль Ломов пен ақын Ян Бруштейн үздік атанды. Енді олардың шығармалары «Юность», «Знамя», «Дружба народов» және басқа да журналдарда жарияланады. Өлеңдер ағылшын, поляк, украин және белорус тілдеріне аударылды. Лауреаттарға ақ мәрмардан жасалған мүсін тапсырылды. Жеңімпаздар сондай-ақ баспамен кітап шығару жөніндегі келісім-шартқа отырды. Оларды таратқаннан түскен қаржының бәрі авторларға беріледі. Жалпы, «Жыл ақыны» және «Жыл жазушысы» ұлттық әдеби сыйлығын Ресей Жазушылар одағы «Авторская книга» баспасымен бірге тағайындайды. Оның үлкен қазылар алқасы құрамына өз ісінің майталманы атанған танымал әдебиетшілер таңдап алынған. Олардың қатарында Святослав Бэлза, Лариса Васильева, Владимир Вишневский, Игорь Волгин, Александр Городницкий, Борис Грачевский, Юрий Грымов, Бақыт Кенжеев, Наталья Нестерова, Валентин Никитин, Марк Розовский секілді танымал қаламгерлер бар. Мұрат Айтқожа. Дереккөз: ИТАР-ТАСС. Фото: ИТАР-ТАСС.