Тараз таунхаустары туралы жоба жүзеге асатын болды

Тараз қаласында таунхаустар құрылысы басталатын болды. Бұл туралы облыс әкімі Кәрім Көкі­рекбаевтың төрағалығымен өткен жиналыста айтылды. «Таунхаус» деген не? Ал­ғаш рет сонау ХІХ ғасырда Ұлыбританияда салынған құры­лыстардың мағынасын қазақ тіліне сөзбе-сөз аударсақ «қалалық үйлер» болып шығады. Олар кейін АҚШ, Канада елдерінде ерекше көп қолға алына бастады. Ал Ресей еліндегі таунхаустар 1995 жылы Мәскеу маңындағы Новгород, Троицк қалалары мен Новые Ржавки поселкесінде салынды. Халықтың көзі үйреніп қалған көп қабатты тұрғын үйлерден таун­хаустардың ерекшелігі неде? Ол не­бәрі екі қабатты және әр пәтердің өз подъездері болады. Сондай-ақ, гаражы, тағы басқа да тұрмыстық қажеттіліктері ескерілуі мүмкін. Тараз­­дағы таунхаустар бұл талаптарға жауап бере ме, жоқ па, оны уақыт көрсетеді. Ең бастысы, «Қолжетімді бас­пана-2020» мемлекеттік бағ­дар­ламасы аясында қолға алын­бақ таунхаустар тұрғындар үшін қолжетімді болмақ. Және үс­тіміздегі жылдан бас­тап «Там Құрылыс» ЖШС канадалық технологиямен 130 отбасыға арналған таунхаустар құрылысын жүргізе бастайды. Облыс әкімінің оларға құрылысты бастайтын жер мә­селесін жедел түрде шешіп беруі де үйден үміттілерді риза етіп отыр. Сонымен бірге, «Қазақстан Ипо­текалық Компаниясы» ИҰ» АҚ Тараз қаласының «Бәйтерек» шағын ауданынан көпқабатты 2 үйдің құрылысын жүргізбек. Облыс басшысының осындай тың бастама, соны шешімдерінің нәтижесінде жыл соңына дейін 200-ге жуық тараздық отбасы қоныс тойын тойлайды деп күтілуде. Көсемәлі СӘТТІБАЙҰЛЫ, «Егемен Қазақстан». Жамбыл облысы. Суретте: шетелдегі таунхаустар осындай.