Еуразиялық экономикалық одақ мәселесі қаралды

Мәскеуде Қазақстан Республикасы Премьер-Министрінің бірінші орынбасары Бақытжан Сағынтаевтың қатысуымен Еуразиялық эко­­­­­­но­микалық комиссия кеңесінің кезекті отырысы өтті. Кеңес отырысында Кеден одағы мен Бірыңғай экономикалық кеңістікті одан әрі дамытудың көкейкесті мәселелері қаралды. Соның бірі Еуразиялық эконо­микалық одақ туралы келісім жобасын әзірлеу жайы болды. Әріптес елдермен бірге келі­сім жобасын дайындау бары­­сын­дағы негізгі тұстар, сондай-ақ, мемле­­­кеттердің өзара тиімді мүдделерін қанағаттандыруға және интеграцияны одан әрі дамытуға бағытталған ережелер талқыланды. Атап айтқанда, сауда саясаты мәселелері, техникалық реттеу және санитарлық-фитосанитарлық шаралар бойынша жемісті талқы­лаулар болды. Экономиканы дамытудың өнеркәсіптік және агроөнер­кә­сіптік, валюта саясаты, қаржы рыноктары сияқты негізгі секторлары бойынша тараптар ортақ пікірге келіп, аталған салаларды өзара тиімді дамыту мүмкіндіктері келісім жобасына енгізілді. Сондай-ақ, бәсекелестікті дамыту, көлік, энергетика және та­биғи монополиялар сала­ла­рын­дағы ынтымақтастық мәселелері қаралды. Тұтастай алғанда, келісім жобасын дайындауды талқылау қорытындысы барысында, өзара тиімді әріптестіктің негізгі қыр­лары бойынша елеулі табысқа қол жеткізілді. Бұдан басқа, Кеден ода­ғында тұты­нылатын жоғары техно­логиялық сала үшін материалдар өндіруді дамыту мақсатында әкелінетін сирек металдарға қа­тысты баж салығын төмендету туралы шешім қабылданды. Экономикалық интеграция­ны дамыту бағытындағы бірлес­кен жұмыс мем­ле­кеттердің тең құ­қық­­ты қарым-қатынас әлеуетін тиімді пайдалануға пейілді екен­дік­тері­нің жарқын көрінісі болып табылады, деп хабарлады Қазақстан Премьер-Министрінің бас­пасөз қызметі.