«Тарихтан белгілі, біздің ата-бабаларымыз соғыс, ашаршылық секілді қиын кезеңдерде елімізге қоныс аударылған көптеген этнос өкілін шетке қақпай, бауырына басқан. Бір үзім нанымен бөлісіп, қонақжайлық танытқан. Сол достық пейіл, бірлігіміз бүгінге дейін жалғасып келеді. Бірлік – бақ-берекенің бастауы демекші, біз көпэтносты мемлекетіміздің ынтымағын, татулығын сақтауға тиіспіз. Қоғамдық келісім – тұрақтылығымыздың, дамуымыздың кепілі. Баршаңызға Қордай, Байзақ, кешегі қаңтар оқиғалары кезінде бірліктеріңізді көрсетіп, түсіністік танытқандарыңыз және қалыпқа келтіру жұмыстарына белсенді атсалысқандарыңыз үшін алғыс айтамыз. «Бейбітшілік пен келісім», «Асарлатып үй салу», «Таразға тарту», «Жомарт түлек» секілді жобалардың жемісті жүзеге асуына көрсеткен қолдауларыңызға ризашылығымды білдіргім келеді. Бұл жобалар мұқтаж жандардың әлеуметтік мәселелерін шешуге ықпал ете отырып, барша жамбылдықтарды бірлікке, қамқорлыққа, патриоттыққа үндейді», деді Б.Сапарбаев. Сондай-ақ аймақтағы этно-мәдени орталықтардың өкілдері мерекенің маңыздылығын атап өтіп, бауырмал қазақ еліне деген алғыстарын білдірді.
Бұдан кейін облыс әкімі Бердібек Сапарбаев «Қоғамдық келісім» мекемесінің «Достық» үйінде жасы жүзге келген бірқатар ардагерді, қоғам белсенділері және түрлі сала қызметкерлерін, жаппай тәртіпсіздік пен төтенше жағдайлар кезінде қызметтік міндетін адал атқарған азаматтарды марапаттады. «Қарғыс алма, Алғыс ал!», деген жақсы сөз бар. Алғыс айту – адамдардың бір-біріне деген ризашылығы, құрметі. Бүгінде Жамбыл облысында 90-ға жуық этностың өкілдері тату-тәтті өмір сүруде. Олардың арасындағы бірлік пен келісімді сақтау, достық қарым-қатынасты дамыту баршамыздың міндетіміз. Біз ең бірінші аға буын ата-апаларымызға елеулі еңбектері үшін алғыс айтуға тиіспіз. Өңіріміздің өркендеуі жолында жемісті жұмыс атқарып, демеушілік, қайырымдылық шараларына белсене атсалысып жүрген кәсіпорындарға, қоғамдық тәртіпті қамтамасыз етіп жүрген құқық қорғау, төтенше жағдай саласының қызметкерлеріне, облыстың дамуына атсалысып жүрген түрлі сала қызметкерлеріне, дәрігерлерге, мұғалімдерге, спортшыларға және барша жерлестерімізге алғыс айтамыз», деді әкім. Сонымен қатар Байзақ ауданынан 95 жастағы қария Серік Мамайұлы сөз алып, өзінің игі тілегін жеткізді. «Соңғы жылдары облыс орталығы көркейіп, тамаша кейіпке еніп келеді. Облыстың барлық бағытында оң өзгерістер байқалады. Осы жолда аянбай еңбек етіп жүрген барша азаматқа ризашылығымды жеткізгім келеді. Қаңтар оқиғасы секілді келеңсіз оқиғалар қайталанбасын деп тілеймін. Елімізде тек бейбітшілік, тұрақтылық болсын», деді ол.
Алғыс айту күніне орай «Көне Тараз» кешенінің алаңында тұрғындарға арналып концерттік бағдарлама, спорттық іс-шаралар, көрме, ұлттық ойындар ұйымдастырылып, тегін ыстық тамақтар таратылды.
Жамбыл облысы
