Қызылорда қаласының әкімдігі жаңа ғимаратқа көшті

Өткен жұма күні Қызылорда облысының әкімі Қырымбек Көшербаев қала әкімдігінің қызметкерлерімен, дербес бөлім басшылары, кент және ауылдық округ әкімдерімен кездесіп, жағымды жаңалығын жеткізді. Ол Қызылорда қалалық әкімдігінің жаңа ғимаратқа көшуі болатын. Бұл туралы Қызылорда қалалық ішкі саясат бөлімінің басшысы Балдырған Мәмен хабарлады. Облыс әкімдігінің жаңа ғимаратқа көшуіне байланысты жарты ғасырлық тарихы бар облыс әкімдігінің бұрынғы ғимаратына қала әкімдігі, қалалық мәслихат орналасатын болды. Бұл ғимарат өңір тұрғындарына қатысты талай маңызды шешімдер қабылданған құтты мекен. Мемлекеттік органдардың ішінде жүгі ауыр саланың бірі – қала әкімдігі. Тұрғындардың күнделікті тыныс-тіршілігінің қалыпты деңгейде әрі үзіліссіз жүргізілуі қала әкімдігі мен әкімдікке қарасты құрылымдардың қызметіне тікелей байланысты.  Бұл орайда, облыс әкімі қала әкімдігіне ұдайы қолдау көрсетілетінін айтып, жаңа ғимаратта абыройлы қызмет етуге тілек білдірді. Сонымен, бүгіннен бастап Қызылорда қаласының әкімдігі жаңа ғимаратқа көшті. Әмірхан Алмағанбетов Дереккөз: Қызылорда қалалық ішкі саясат бөлімі. Фото: www.Wikimapia.org.