Көпбалалы және аз қамтылған отбасыларға жан-жақты көмек көрсету мақсатында 2019 жылдың тамыз айынан бастап Алматының әр ауданында «бір терезе» қағидаты бойынша «Бақытты отбасы» орталықтары жұмыс істеп келеді. Зульфия Байсақованың айтуынша, бүгінде қалада 30 339 көпбалалы отбасы тұрады. Көпбалалы аналардың 4 855-і «Алтын алқа», «Күміс алқа» алқаларының иегерлері. Сонымен қатар 1 300-ден астам отбасы атаулы әлеуметтік көмек алады.
«Бақытты отбасы» орталықтарында психологиялық және заңгерлік көмекпен қатар жұмысқа орналасу мен бос уақытты тиімді пайдалану бағытында кеңестер беріледі.
«Біздің орталықтарда аналар мен отбасыларға профильдік курстардан өтуге көмектесетін Isker ana бағдарламасы жұмыс істейді. Кәсіпкерлер палатасында әйелдер кәсіпкерлік негіздеріне оқытылады. Осы бағдарламаның көмегімен көптеген ана өз бизнесін ашып, азық-түлік және киім-кешек сауда орындары, Әуезов ауданындағы аспаздық, қаланың бес ауданындағы тігін цехтарының жұмысы жолға қойылды», деп атап өтті З.Байсақова.
Зульфия Байсақова атап өткендей, «Бақытты отбасы» орталықтарында отбасылық құндылықтарды дәріптеу, отбасын құрметтеу және өскелең ұрпақты адамгершілікке тәрбиелеу, көпбалалы отбасылардың лайықты өмір сүру жағдайларын жақсартуға көмектесуге басымдық беріледі. Бүгінде көпбалалы отбасылардың көпшілігі Алатау ауданында тұрады.
Нақты шаралар қоғамның алға жылжуына ықпал етеді. «Бақытты отбасы» орталығында ашылған қолөнерді дамыту орталығының жұмысы жолға қойылған. Осы орталық арқылы 12 мың адам оқыту курстарынан өтті, мыңнан астам әйел тігін шеберханалары, аспаздық, баспахана, сұлулық студиялары сияқты жеке істерін ашуға және дамытуға өтеусіз гранттар алды. Осындай курстардың нәтижесінде әйелдер табыс тауып қана қоймай, өз отбасыларына қуаныш сыйлап алға қойған мақсаттарын жүзеге асыруда. Бүгінде «Бақытты отбасы» орталықтарына отбасы жағдайын жете білетін, олармен тығыз жұмыс істейтін әрі қордаланған мәселелерін дер кезінде шешуге маманданған көпбалалы аналардың өздері басшылық етуде. Бұл орталықтар келем деушілерге әрдайым ашық әрі мұнда жаңа жобаларды бастау мүмкіндігі мол.
АЛМАТЫ
